Lalduhoma’n lawmawm ti

ZPM Legislature Party Leader, Lalduhoma chuan phur taka mipuiten thawhlawm an thawh theihna tura sawrkar tawng chhuahtir chu an tum ber a nih thu a sawi.

Nimin a Press Statement a tihchhuah ah ZPM Legislature Party Leader chuan mithiam te chuan Mizoram sawrkar in loh theih lohva thla tina sum a sen ngai zat chu cheng vbc. 752 a nih thu leh chu chu senso dang tel miah lovin hlawh leh pension leh sawrkar inrelbawlna atana thla tin a hmanral ngai zat a ni tih sawiin, tunah chuan, kan State sum hnar lian berte zinga mi GST chu, sumdawnna a chawlh tak avangin a lo tlahniam chak ta hle tih a sawi a. GST atanga March thlaa kan hmuh chu cheng vbc. 32 vel a nih laiin April-ah chuan cheng vbc. 9 vel lek a lo ni ta tih sawiin, “Kumin-a kan State-in ama sum hnar (own source) atanga sum a hmuh beisei zat cheng vbc. 1442 chu kan hmu pha dawn ta lo tih a chiang hle a. Lo hmu pha pawh lo ni tehreng ila, chu chuan loh theih lohva sen ngai (Committed Expenditure) thla 2 chhung mamawh pawh a daih lo sa hrim hrim a ni,” a ti.

Lalduhoma chuan kan State-in ama sum hnar atanga hmuh a beisei chu kan hmu pha dawn lo tih leh Central atang pawhin beisei ang kan hmu dawn lo tih hi a chiang tih sawiin, hei vang hian kan dinhmun nena inmila kan Budget her rem (Re-appropriate) turin Special Session neih pawh a rawt tawh tih a sawi a. Chutiang chu kan dinhmun a nih laiin, engmah sawi chian awm si lovin, sawrkar hnathawkte hlawh cut tumna a lo awm ta hial tih sawiin, hei vang hian sawrkar sum hmuhna hrang hrangte Press Statement siama tarlang a nih thu a sawi a, “Ka tum ber chu, phur taka mipuiten thawhlawm kan thawh theihna tura sawrkar tawng chhuahtir a ni. Kan CM a lo tawng chhuak ta leh Finance Department-in thuchhuah meuh siama min rawn chhang ta hi hmasawnna chi khatah ka ngai a, lawmawm ka ti khawp mai,” a ti bawk.