Chhangthawp man ah hma la

Serchhip District-a COVID-19 Supply Chain Management Committee chuan Serchhip-a Chhang-thawp man tisangtute chungah a tul anga action la turin thuneitute ngen nise an ti.
Thudawn danin tunhnai khan Serchhip-a Chhangthawp Rs. 20/- a zawrh thin chu Rs. 30/- ah tihsan a ni a, hemi chungchang hi April 16 khan Serchhip DC, Dr. Lalzirmawia Chhangte hovin a Pisa-ah Bakery neitute nen sawiho niin Rs. 25/- ai to lova zuar turin ruahmanna siam a ni a. Amaherawh chu he ruahmanna bawhchhiaa Rs. 30/- a zuar an awm nia sawi a awm avangin nimin zing khan COVID-19 Supply Chain Management Committee chu Bakery neitu thenkhat te In-ah an leng a ni.
Hetianga Chhangthawp man tihsan a nih avang hian ruahmanna zawm lova Chhangthawp man tisangtute hi COVID-19 Supply Chain Management Committee chuan Serchhip DC koh tir nise, an chungah a tul angin action la tura ngen nise an ti bawk.
Hetihlai hian tunhnaiah Serchhip-ah thil chi hrang hrang man a sang nasa hle nia sawi a awm a, ramdang nena inkalpawhna khar a nih hnuah pawh rampawn atanga lakluh nia hriat Sikret chi hrang hrang zawrh a tamin a man pawh a sang hle nia thudawn a ni bawk.

Comments

Chhiar Hlawhte