Chanchin thar thenkhat :

Buk diklo-a Sa zawrh man

Nimin zing khan Legal Metrology Enforcement Staff, Siaha leh MADC sawrkar-a LAD te chu Siaha khawpui chhunga hmun hrang hranga Vawksa buk te enkualin an duty a, buk diklo a hralh mi 4, Meisatla-ah 1 ,Meisavaih East-ah 2, New Siaha East-ah 1 leh New Siaha West-ah 1 man an ni a, heng mite Dan anga hremna pek an ni ang. heng buk diklo-a Sa zuar te hian Kg. khat buk turah gram 800-900 ten an buk tih sawrkar thuchhuah chuan tarlangin, Market chhungah sat lovin hmun remchang lai leh kilkhawr tak takah an sat niin a tarlang bawk. Siaha-a Legal Metrology hian May ni 1, 2020 khan Siaha a man to uchuak taka Sikret supply tu pakhat chu man in dan angin an lo hrem tawh bawk a ni.

Champhai-ah 22 hruai haw
Mizoram Sawrkar ruahmanna kaltlanga India hmarchhak State atanga Champhai mi leh sa tangkhang hruai haw hna thawh mekah nimin thleng khan mi 22 hruaihaw an ni tawh a, State dang a tangkhang hruaikirte hi an hriselna te enfiah niin, Rapid Antibody Testing hmanga test an paltlang hnuah DPRC Quarantine Centre, Cham-phai Bawrhsap pisa bul, Keifangtlang-ah ni 14 chhung dahhran turin dahluh an ni. Heng hruai haw zinga mi 16 te chu Khawkawn Tuivai kal-tlanga Manipur atanga Champhai lo haw te an ni a, a dang 6 te chu Vairengte kaltlanga Assam atanga lo haw te an ni a. Vairengte kaltlanga Me-ghalaya atanga lo haw mi 6 chu kawng lakah an la thang mek bawk a ni.

Hmai tuam zel turin ti
Aizawl District Magistrate, Vanlalngaihsaka chuan COVID-19 hrileng laka mipuite him theihna atan mipuite zawm tur thupek tichhuakin Pawn chhuak tur reng reng chuan Face Mask leh hmanraw dang hmangin hmai an tuam tur a ni tih a tarlang a. Hei bakah hian Vantlang hmun leh dawr a kalte chu metre khat tala inhlata awm tur a ni tih tarlangin, he thupek zawmlo te chu Dan anga hrem theih an nih tur thu a tarlang bawk.

CYLA in ramri-a duty tlawh
COVID-19 laka Mizoram a him theihna tura Lawngtlai District chhunga International Boundary-a duty leh Branch YLA-te chu niminpiah khan Central YLA hruaitu mi 24 te chuan an tlawh a, Central YLA hruaitute hi Team hnih (2)-ah inthenin Team khat hi Zochachhuah lamah kalin Team dang hian Vathuampui lam an kal bawk a. Heng Central YLA Team te hian ramri-a duty te an tlawh bakah khaw hrang hrang ah eitur Buhfai, Alu, Dal, Chi leh Silpauline te an pe bawk. Hetihlai hian sawrkar ruahmanna anga India hmarchhak State atanga Mizoram mi hruaihaw hna thawh ah Lawngtlai District-ah hian mi 42 hruaihaw an ni tawh a, heng mite hi sawrkar in inkhunghranna tura a ruahman ah dahluh nghal vek an ni.

Mizoram-ah COVID-19 vangin mi 74932 enfiah tawh
Nimin tlai dar 5:00 thleng khan Mizoram ah COVID-19 avangin mi 74,932 te enfiah ni tawhin mahni In lama inkhunghrang tura tih mi 7152 leh sawrkar hmun ruat bika inkhung-hrang mi 1142 an awm tawh a. Rapid Anti Body Test of India (RATI) hmanga enfiah mi 90 awm tawh bawkin COVID-19 test tura sample lak mi 183 an awm tawh bawk a. Heng Sample lak te atang hian COVID-19 kai hmuhchhuah mi 1 a awm tawh a, hei hi enkawlna pek mek niin a dinhmun pawh a tha chho zel bawk a ni. He natna kai nia rinhlelh Damdawi In-a dah mi 32 awm tawhin an zinga mi 29 chu chhuah tir an ni leh tawh bawk a ni.

Comments

Chhiar Hlawhte