Chanchin thar thenkhat :

Mi 1323 man an ni tawh

COVID-19 hripui laka invenna tura Dan siam, Containment and Prevention of Covid-19 Ordinance 2020 chu a taka hman a nih hnuah Inrinni thleng khan mi 1323 chu dan an bawhchhiat avangin pawisa chawitir an ni tawh a, dan bawhchhetute pawisa chawi tlingkhawm hi Rs. 3,15,300/- a tling tawh bawk. He Dan bawhchhia hi District 5-ah man awm tawhin Aizawl District-ah man an tam ber a, mi 1143 man ni tawhin an pawisa chawi tlingkhawm chu Rs. 2,81,900/- a ni a, Lunglei District-ah mi 105 man tawhin Rs. 11,000/- an chawi a, Siaha District-ah mi 58 man awmin an pawisa chawi tlingkhawm chu Rs. 9900/- a ni a. Serchhip District-ah mi 12 man tawhin an pawisa chawi Rs. 12,000/- a tling a, Champhai District-ah mi 5 manin an pawisa chawi tling-khawm chu Rs. 500/- a ni bawk.

CM in Lengpui Airport tlawh

Chief Minister, Zoramthanga chuan Inrinni khan Lengpui Airport thawmthat hna thawh mek chu a hmunah a enfiah. Lengpui Airport Runway resurfacing hna hi thawh zawh thawkhat a ni tawh a, Apron Extension, Runway sir a tuiluan kawr siam mek te, Airport hungna Security Fencing leh Lengpui Airport tui lakna tur ruahmanna thar bakah Terminal chhung siamthat ngai te chu Chief Minister hian Civil Aviation, PWD leh PHED hotute nen enfiahin ruahmanna an siam a. Tui lak chungchangah tuna ruahmanna awm mek bakah ruahtui khawl theih dan tur ngaihtuah tha a tih thu Chief Minister hian a sawi a. Airport a hna kal mek chu lockdown chhungin a tam thei ang ber thawh zawh tum turin thawktute a chah bawk.

Cheng vbc. 7.6 lut tling tawh

Mizoram-a COVID-19 dona atana Chief Ministers’ Relief Fund-a sum lut chu cheng vbc. 7.6 a tling tawh a, Committee on Utilization of CM Relief Fund for COVID-19 in a ruahman leh Chief Minister-in a remtihna angin Thawhlehni (May 5, 2020) thleng khan Rs. 5,48,97,065/- chu hmanral a ni tawh bawk.

MPCC in sawrkar an phut

Mizoram Pradesh Congress Committee chuan COVID-19 avanga inkharkhipna Mizoram chhung hmun tam takah thlahdul a ni chho mek tih sawiin, ramri-a Duty Police tam zawk chu dinhmun chhe takah an awm mek tih hriat a nih thu an sawi a. Sawrkar chu ramri a duty Police-te bonus a pe thei lo a nih pawhin thuam tha lehzual tur le, ration (ei tur) pawh hnianghnar zawka pe tura phutin Village Level Task Force leh YMA volunteer duty te pawh an duty chhung chu Honorarium (kut hah man) pe tura an phut thu an sawi bawk.

Mipuite zahlohna ah ngai

MPC Party chuan Zoram mipuiin hripui kan do tlan mek laia Political Party thenkhatin mipuite mitmei venna nei hauh lova mahni party hamthatna ûm a inbeihna hmanrua atana an lo hmang thin chu mipuite zahlohna leh tham-lohna lian takah an ngai tih an sawi a. He hri laka invenna tura  thuneituten inkaihruaina dan an siamte chu ngai pawimawh tura mipuite chu chahin, Ramri dep-a duty te tun aia nasa leh hniang-hnar zawka an mamawhte thuamtha lehzual turin sawrkar chu an phut bawk.

Hruaihaw te khunghrang mek
India hmarchhak State hrang hrang 4 atanga Mizoram mi hruaihaw te chu sawrkar hmun siam ah te khunghran mek zel an la ni a. Aizawl District chhung mi 630-te chu hmun 12-ah khunghran mek niin Kolasib District chhunga inkhunghranna hmun hrang hrang 9-ah mi 155 enkawl mek an ni a, Champhai Keifangtlang-a DPRC hmunah mi 34, Serchhip inkhunghranna hmun 2-ah mi 51, Lawngtlai inkhunghranna hmun 3-ah mi 18 leh Mamit-ah mi 31 dah mek an ni bawk.