ZPM in sawrkar hmalakna an ngaihven reng tih an sawi

ZPM Thalaite chuan Mizoram Sawrkar-in COVID-19 dona a kalpui dan chu ngun takin an ngaihven reng tih an sawi.

Nimin a thu-chhuah an siamah ZPM Thalaite chuan SARS-CoV-2 leh a natna thlen COVID-19 donaa Mizoram Sawkar-in ruahmanna a siamte leh a hmalakna te thlawp tur leh mipuiin an hlawkpuina turah sawisel a tul huna sawisel turin an ngaihven reng tih sawiin, Home Minister, Medical Operational Team member-te leh Central YMA hruaituten thingtlang-a duty-na hmun hrang hrang an tlawhkual chu lawmawm an tih thu leh rah tha a chhuah ngei an beisei thu an sawi a. Ramri-a silpaulin zar hnuaia duty post-a awmte tan pawh Home Minister hmalakna in ruah leh thli karah pawh thlamuang taka an tawm ngamna tur siam a nih thuai an beisei thu leh ramhnuaia VLLTF duty-te ei leh in tur leh, hri laka invenna an mamawhte khaihlak awm lova an dawn theihna tura ruahmanna siam turin sawrkar chu an ngen bawk.

Hei bakah hian ZPM Thalaite chuan School Education Department in HSSLC exam neih tura ruahmanna a lo siam tawh pawh Ministry of Home Affairs, Govt. of India thuchhuak avanga thulh a ni chu lawmawm an tih thu an tarlang bawk a. Mizoram sawrkar-in State hrang hrang Mizoram House-a Mizo tangkangte, an riah man leh an chaw eina man thîn an nihlohna tura sawrkar-in thuchhuah a siam tawh hnuah, Mizoram House-a awm te'n harsatna an la tawk chu pawi an tih thu sawiin, Sawrkar-in ruahmanna a siam hi taka kalpui nghal turin an ngen tih an sawi a. COVID-19 dona chu lungrual tak leh hlawhtling zawka kalpui a nih theih nan hmanrua leh sawrkar sum sem chu Minister leh MNF MLA-te tih tir lova, Sawrkar Official-te rang taka semtir thin tura an ngen thu an tarlang a. Mizoram Sawrkar-in Central Sawrkar atanga COVID-19 dona atan leh he hri leng avanga miharsate chhawmdawlna tura sum a pekte dik taka hman a ni em tih chu an chhui zui zel dawn tih an tarlang bawk.