Vairengte in darkar 24 chhunga hmalak an phut

Vairengte Joint Village Council huaihawta Vairengte khawchhunga Tlawmngai pawl hrang hrang leh Local Task Force te inhmukhawm chuan Vairengte Checkgate-a ‘screening’ kalpui mek chu an duh tawkloh thu an sawi a, nimin tlai dar 5:00 atanga darkar 24 chhung Mizoram mipuite himna tur atana Zoram kawtchhuah ah rua-hmanna felfai tak a neih loh chuan Vairengte atanga nitin mamawh lakluhna leh a luhka zawng zawng danpin nise an ti.

Nimin a Vairengte Multipurpose Hall-a he inhmuhkhawm ah hian COVID-19 laka Mizoram a him theih nana hma lak dan tur hrang hrang sawiho niin thenawm State-ah COVID-19 vei an awm tawh avanga fimkhur a ngaih lehzual tawh avangin Vairengte Checkgate-a Screening kalpui mekah ASHA te mai ni lo, mithiam bik Doctor ngei duty thei se an duh thu an sawi a. State pawn atanga nitin mamawh lakluh danah pawh a remchang changin la lut mai lovin, District tina mamawh dan mila ei leh bar la lutin, phai lam lirtheite chu Mizoram-a rawn lut lovin an bungraw phurhte inhlanchhawn thin nise an ti a. State thenawm nena inkalpawhna khân hrang hranga Police dah an duh thu an sawi bawk.