Serchhip-a Tui sem-ah harsatna a awm rihlo; Tui bill a hlawma siam a ngai dawn

Serchhip-a PHE Department hotute chuan Lockdown kalpui mek avangin Tui semchhuah chungchangah harsatna an tawklo tih sawiin, Tui Bill chu a hlawma siam a ngai dawn tih mipui ten lo hre lawk se an duh thu an sawi.
PHE Serchhip WATSAN Division-a thawktute chuan tunlai hri leng mek avanga Lockdown kalpui, March 22, 2020 atang khan Tui pump chungchang ah harsatna an tawhloh thu sawiin, niminpiah tlai khan Tuikum lui atanga Tui an pump chhuahna ah harsatna tlem tawk mah se nizan hmasa dar 8:45 atang khan Dan pangngaia Tui hi pump theih a nih thu leh Veng hrang hrangah an sem hun pangngai zelah Tui hi an la sem theih thu an sawi a. Mipui ten khaihlak lova hnianghnar taka Tui an hmuh theihna tur hian theihtawp an chhuah thu sawiin, Tui pump hna thawktute chuan chhun zan zawma Tui hi an pump reng thu an sawi a. Tui Pump nana tha taka Power Supply petu P&E Department leh Diesel harsat laia Supply Department-in Diesel tam tak an ngaihtuahpui avangin lawmawm an tih thu an sawi bawk.
Serchhip-ah hian PHE Department Staff mi 150 vel an awm a, Serchhip Town (Serchhip & Chhiahtlang) bikah hian consumer mi 3749 an awm a, PHE Department Staff-te hi COVID-19 laka an himna turin Mask leh Glove hmang veka duty-tir an ni a, Tui semtute chu Disinfectant Chlorine/Sodium Hypochlorite pai tir vek niin Tui semtute hian T-Cluster ah Tui hi on in mipuite chu anmahni In lamah lo on ve tura tih an ni thung a. Hripui len laia mipui mamawh Tui Pump leh tih thianghlim leh sem kawnga duty PHE Department Staff te chu tunkar atang khan an hlawh pangngai bakah nitin chhun-a an ei leh in tur leina tur pek belh an nih tur thu PHE Serchhip WATSAN Division-a Sr. EE, Er. F. Lalsanglura chuan a sawi bawk a ni.
PHE Department hian Chlorine/Sodium Hypochlorite hi an Tui sem tura pawlh tur an siam bakah natna laka invenna turin an siam belh bawk a, hengte hi mimal, YMA leh Village Level Task Force engemawzatin an la tawh a, Tui sem-a pawlh tur an siam bakah hian litre 1000 chuang an pechhuak tawh a ni.
PHE Department hotute chuan tun dinhmunah chuan Tui Bill siam tura hmalak ngam a nih loh thu pawh sawiin, Lockdown zawh ah Mater Reading leh Bill Process a tih theih dawn chauh avangin, Tui Bill hi a hlawma siam a ngai dawn tih an sawi a, thla dang aiin Tui bill pawh a tam dawn avangin mipuite an hriattir lawk tih an sawi bawk.

Comments

Chhiar Hlawhte