Lockdown avanga tangkhang te Vawiin atangin an haw theihna hun siam sak a ni dawn

Mizoram hmun hrang hrang leh Aizawl Veng hrang hranga Lockdown puan avanga tangkhang te chu Vawiin atang hian anmahni khuaa an haw theihna hun siam sak an ni dawn.
Mizoram Chief Secretary Lalnunmawia Chuaungo chuan nimin khan Aizawl-a Secretariat Conference Hall-ah Aizawl City Local Council Association, All Mizoram Village Council Association leh Mizoram NGO Co-ordination Committee a Constituent Member hruaitute Meeting neih puiin hemi chungchang hi an sawiho a. Lockdown kalpui a nih avanga tuna Mizoram hmun hrang hrang leh Aizawl Veng hrang hranga tangkhang te chu an mahni khua theuha an haw theihna tur atan Vawiin (09.04.2020) atangin hun hawn remtih a ni a, amaherawh chu tuna an awm mekna Local Council Task Force emaw, Village Council Task Force leh an haw-na tur Local Council Task Force emaw, Village Council Task Force te remtihna lak hmasak ni se tih a ni.
Aizawl leh Mizoram khawchhung hrang hranga Lockdown avanga tangkhang te hi COVID-19 hri lanchhuah theihna hun chhung (Incubation Period) a zawh tawh avangin COVID-19 hripui lakah hian an him ni a ngaih a ni a. An haw na tur khua-ah te dahhran (Quarantine) a tul lo a ngaih a ni. Hetianga mahni khaw lama haw tur te hian an haw na tur ruahmanna an in siam thei anga. He phalna hian mi thenkhat tulna awm lem lo a zin satliah leh zin fang tur te a huam lo a ni.

Comments

Chhiar Hlawhte