Chanchin thar thenkhat :

MJA in ramri venhimna tlawh

MJA Champhai District Member te chuan nimin khan COVID-19 avanga Lockdown kalpui meka Zokhawthar leh |iau lui dunga Local Task Force te duty-na hmun hrang hrang an tlawh a, he hri leng laka Mizoram a him theih nan leh Myan-mar atanga mihring leh bungrua reng Mizoram-a a lo luh lohna turin Zokhawthar Task Force te hi chhunzan zawmin Indo-Myanmar Border Trade Centre Zokhawthar-ah leh |iau luidung ah chhun zan zawmin an duty mek a ni.

Synod in thuchhuah siam
Mizoram Presbyterian Kohhran chuan Co-ronavirus hripui leng mek avanga sawrkar laipui in March 25 atanga April 14, 2020 chhunga ram-pum huap Total Lock down a kalpui mek avangin Good Friday chhungin Lalpa zanriah sakramen pawh buatsaih theih a ni dawn lo tih sawiin, hemi avanga Kohhran mite rilru natzia an hriatin pawi an tih thu leh hrehawm an tih thu an sawi a. Hetihlai hian online/youtube/TV live telecast hmanga Lalpa zanriah sakramen buatsaih tumna a awm thu hriat a nih thu leh hei hi Synod OM chuan tha an tih loh thu sawiin, “Kan kohhran mite chu online/youtube/TV live telecast hmanga sakramen buat-saih zawm lo tur leh lo inthiarfihlim turin kan ngen a che u,” an ti bawk.

MPCC in sawrkar an ngen
Mizoram Pradesh Congress Committee (MPCC) chuan Mizoram in Lockdown chawlh-kar thumna kan hman mekah ei tur nei mumal tawh lo, a leina tur pawh nei chuang lo chhungkaw tam tak an awm tawh nia sawiin, Mizoram sawr-kar chu heng mite dinhmun ngaihtuahpuia tanpui chhunzawm zel thei se an duh thu an sawi a. Hei bakah hian Mizoram-ah COVID-19 vei hmuh belh a nih loh avangin nitina eichawp dapa khawsa chhungkaw tam zawkte dinhmun ngaihtuah chungin, ei leh bar dinhmunin a tawrh lutuk loh nana Lock-down thlah zalen hret hret dan tur ruahmanna thar (exit plan) siam thuai turin Mizoram sawrkar chu an ngen bawk.

CM hnenah ngenna thlen
Congress President leh Chief Minister hlui, Lal Thanhawla chuan India ram hmun hrang hranga Mizo leh Chin unau tangkhangte tanpui tura ngenna chu Chief Minister, Zoramthanga hnenah a thlen a, India ram hmun hrang hranga Mizote leh Chin unau tangkhangte zingah ei tur nei tawh lote, sum leh pai neih tawh loh avanga mangang tam tak an awm nia tarlangin, Hnam ang pawha Mizote kan mualpho loh nan leh India ramah Lockdown chhunzawm zel a nih hmel bawk si avangin heng mite tanpuina hi thil hmanhmawhthlak tak nia a ngaih thu a sawi bawk. He ngenna hi MPCC President aiawhin Media Dept Chairman, Lallian-chhunga leh MPYCC President Dr. Lalmalsawma Nghaka ten thlenin, MPYCC President hian CM Relief Fund-ah Rs. 20,000/-a pe nghal bawk.

Him taka lakluh dan tur rel
COVID-19 Medical Operational Team Chairman, Dr. ZR. Thiamsanga MLA hovin nimin khan Aizawl-ah State pawn atanga Thlai leh Thei kan lakluh thin mipuite ei leh in tur atana a him thei ang bera pack, phurh leh unload dan tur sawiho a ni a, hemi bawhzui hian Vawiin hian Vaireng-te an tlawh zui bawk ang.

NSUI (Mz) in sawrkar ngen
National Students Union of India (NSUI) Mizoram State chuan COVID-19 avanga harsatna thleng mekah Mizo thenkhat, India State dang-a Mizoram House leh Mizo Welfare awm ve lohna hmuna tangkhang leh harsatna tawk an awm nual nia sawiin, heng mite buaipuitu tur Nodal Officer a rang thei ang bera ruat turin Mizoram sawrkar chu an ngen.

MPC in lawmawm an ti
MPC Party chuan Zoram Medical College (ZMC)-a COVID-19 Sample Test Laboratory hman theiha ruahman fel a ni ta chu lawmawm an tih thu thuchhuah siama tarlangin, Health Minister Dr R.Lalthangliana thawhrimzia a tilang chiang hle ah an ngaih thu an tarlang a. Hetihrual hian then-awm State nen-a inrina venhimna ah tun aia khauh zawka hma la turin sawrkar chu an phut bawk.

Comments

Chhiar Hlawhte