Chanchin thar thenkhat :

CM Relief Fund semchhuak

COVID-19 dona tura CM Relief Fund a sum lutte hman dan tur ruahmanna siam tu, Committee on Utilization of Chief Minister’s Relief Fund for COVID-19 in ruahmanna an siam angin Mizoram District hrang hranga CM Relief Fund chu semchhuah a ni dawn a. Aizawl District-ah Rs. 62,68,000/-; Lunglei District-ah Rs. 25,18,000/-; Siaha District-ah Rs. 16,26,000/-; Serchhip District-ah 12,77,000/-; Kolasib District-ah Rs. 23,79,000/-; Mamit District-ah Rs. 18,60,000/-; Lawngtlai District-ah Rs. 28,00,000/-; Champhai District-ah Rs. 16,83,000/-; Khawzawl District-ah Rs. 6,90,000/-; Siatual District-ah Rs. 10,19,000/- leh Hnahthial District-ah Rs. 7,30,000/- te pek an ni ang.

Thlai thar lakhawm zel

COVID-19 avanga inkharkhip kalpui mek ah thlai tharlam hmuh zung zung tur awmlohna Lunglei khawpui chhunga mipuite thlai thar mamawh pechhuak tura lakkhawm hna chu Lunglei District Supply Chain chuan tluang takin an kalpui mek zel a. Tun thlengin Lunglei District huam-chhunga khaw 29 atangin thlai chi hrang hrang 40 chuang Lunglei khawpui leh a chhehvela sem chhuah turin lakkhawm a ni tawh a, he hmalakna hi March 28, 2020 atanga kalpui niin tun din-hmunah thlai thar trip 43 lakluh a ni tawh a, hei hi cheng nuai 22.4 man hu niin heng zingah hian Zikhlum 190.75 quintals, Bakbawn 95.25 quintals, Tomato 30 quintals, Antam tel 10,500, Thingthupui tel 4000 leh Maian tel 2400 te chu a tam zual te an ni.

Cold Storage hman theih ta

Khawzawl-a Horticulture Department hmun a Cold Storage chu COVID-19 Vegetable Food Chain a hman tur thlai hring vawn thatna atan hman theih tura peihfel a ni ta a, helai hmuna hman tur Electric Transformer 100KV chu Inrinni khan Khawzawl-ah hian phurh thlen niin bun fel a ni a, he Cold Storage-ah hian thlai chingtute leh thlai thar zuarten an thlaite an dahtha tan tawh a ni.

Sample test hmasa turin ti

Health Department chuan thuchhuah siamin pawl leh mimal tlawmngai te’n COVID-19 hripui leng mek dona atana tangkai leh pawimawh tak, kut tihfaina (Hand Sanitiser) an siam chhuak thin chu lawmawm an tih thu sawiin, hetih rual hian fimkhur a ngaih thu leh, Hand Sanitiser siamchawp te hi quality tha leh sawrkarin tehfung (standard) a siamte tling ngei tur an nih avangin Hand Sanitiser an siamchhuah quality that leh that loh hriat nan Food and Drug testing Laboratory, Central Medical Store, Zemabawk-ah emaw RIPANS, Zema-bawk-ah emaw a sample test tir thin turin an ngen.

Motor thian thianghlim

Mizoram in nitin mamawh leh bungrua a lakluhna ber, Assam-ah COVID-19 vei hmuhchhuah an nih hnuah Assam atanga Mizoram-a nitin mamawh lakluhna motor veivak leh an bungraw phurh te Mizoram tan him lo theia ngaihna lian tak a awm tak avangin Mizoram-a lut tur bungraw phur motor te chu Vairengte Police Checkgate-ah natna hrik thahna hlo, Disinfectant Spray hmanga then thianghlim thin an ni a. Hemi hmalam hian Vairengte khawtlang chuan heng lirthei te hi Mizoram lut theilo tura danchah hial an lo tintuah tawh a ni.