Model Bamboo Plantation-a hma la turte hnena Chief Minister in tanpuina a semchhuak

Chief Minister, Zoramthanga chuan Inrinni khan Lengpui Community Hall-ah SEDP hnuaia Model Bamboo Plantation beneficiary mi 215 te hnenah tanpuina a semchhuak a. |anpuina dawngtute hi Bamboo Development Scheme hnuaia hmalakna hmasa ber, Hmunpui leh Lengpui chhehvela Model Bamboo Plantation siam tura thlan te an ni.

SEDP hnuaiaModel Bamboo Plantation beneficiary te hnena tanpuina semna hunah hian Chief Minister, Zoramthanga chuan Bamboo Development Scheme chu State Flagship Programme, SEDP beihpuithlakna tura duan a nih thu sawiin, beneficiary thlanchhuahte hnena an hna thawhna puihna tur sem chu ram economy siamthatna tura bultanna pawimawh tak a nih thu a sawi a. He hmalakna hi State Level-a Raw phunna beihpui lian ber a nih thu a sawi bawk. Chief Minister chuan he huna kalkhawm beneficiary te chu thahnemngai taka thawk tura fuihin, an hmalak dan ang zelin puihna pek an nih dawn avangin an hlawhtlin leh hlawkna chu anmahni a innghat a nih tur thu a sawi a. Hlawk an duh chuan mithiamten hmalak dan tur an hrilh te chu ngaipawimawh turin a hrilh a. Chief Minister chuan Society din pawimawh thu pawh sawi bawkin, hotu tur inthlangin VC te nen tangkawp a, chungmite kaltlang chuan sawrkarin hma a lak tur thu a sawi bawk.

He hunah hian Bamboo Development Board Vice Chairman, Dr. K. Pachhunga MLA pawhin Mizoram economy in hma a lo sawn theihna tura SEDP hmalakna pui ber, Bamboo Development hnuaia beneficiary te puihna sem hmasakna ber chu thil chhinchhiahtlak tak a nih thu a sawi a. Beneficiary te chuan duhsakna an dawn te taimakna nen lawmthu sawina ah lantir tura chahin, theihtawp an chhuah a rin thu a sawi bawk.

Model Bamboo Plantation atan hian Hmun-pui-ah beneficiary 100 leh Lengpui atangin mi 126, an vaiin beneficiary 226 thlan an ni a. Tun tuma tanpuina semna hunah hian an zinga mi 215 hnenah sumfaia puihna sem a ni a, a dang mi 11 erawh lo a la vah loh avangin la pek rihloh a ni. Tun tumah hian beneficiary pakhat tan tan-puina hi Rs. 12,500/- (a khur laihna atan Rs. 10,000 leh mang khawhna tur atan Rs. 2,500/-) pek a ni a. An hmalak dan azirin a bak chu inpek leh zel tur niin Mau chinna kara Hmarchate chin tur pawh pek belh leh zel tur a ni. Model Bamboo Plantation-ah hian Raw chi khat, Brandisii chu chin tur a ni a. Inrinni-a tanpuina semna ah hian sawrkar mi pawimawh te an tel bawk.