Mamit Damdawi In sa dawn

Mamit District-a khum 100 awmna Hospital sakna turin thawhhona thuthlung, Memorandum of Understanding chu nimin zing khan Health and Family Welfare Department leh Power Finance Corporation ten an ziak.

Chief Minister Office, Aizawl-a he thawhhona thuthlung ziahna hunah hian Chief Minister, Zoramthanga leh Mamit bialtu MLA, Er. H. Lalzirliana te pawh telin Mizoram sawrkar-a Health Secretary, H. Lalengmawia leh Power Finance Corporation atangin Praveen Kumar Singh, Director (Commercial) ten an hming an ziak a. Mamit District Hospital building thar sakna tur project hi ‘Construction of District Hospital Mamit In-Patient Department (IPD) block’ tih niin Project Cost hi cheng vbc. 17.93 a ni a. Power Finance Corporation hian cheng vbc. 12.5 an tum ang a, a bak zawng chu State in a tum dawn a, kum hnih (2) chhunga zawh tura ruahman a ni.

He MoU ziahna ah hian Chief Minister, Zoramthanga chuan Mamit chu Aspirational District a nih angin kawng hrang hranga hmasawnna hna thawh a pawimawh thu leh, chung zingah chuan mihring hriselna leh inenkawlna tih hma-sawn chu a pawimawh zual thu a sawi a. Power Finance Corporation ten an Corporate Social Responsibility kaltlanga District mamawh tak mai, Hospital building thar din a ni thei tur chu lawmawm a tih thu a sawi bawk. Mamit bialtu MLA, Er. H. Lalzirliana pawhin Mamit District in Hospital thar a nei tur chu lawmawm a tih thu leh, tha tak leh chak taka hna kalpui a nih theih nan tha taka vil a nih tur thu a sawi bawk.

Nimin zing-a MoU ziahna ah hian Directorate of Hospital and Medical Education hotute leh Power Finance Corporation atangin an Commercial Director bakah, R. Murhari, Executive Director (CSR&HR) leh Shwetabh Verma, DGM te an tel a ni.