Latest News

Home Minister leh Dy. Speaker in Hriangtlang-ah Tawi tlang Block MHIP khawmpui an hmanpui

Tawi tlang Block MHIP Conference vawi 10-na Hriangtlang khua-a neih chu Vawiin khan Home Minister, Lalchamliana chuan khuallian nia hmanpuiin Assembly Deputy Speaker, Er. Lalrinawma chuan khual zahawm niin a hmanpui bawk.
Hriangtlang khuaa Bungpui Run-a Tawi tlang Block MHIP Conference-ah hian Home Minister, Lalchamliana chuan MHIP Conference hmanga kalkhawmte chu chibai bukin, Mipa tih theih ang ti ve thei tur leh Mipa tluk thei tura tan la tura fuihin, Mipa chunga roreltu nih erawh tum lo turin a chah a. Pathian in min zirtirna angin, 'Hmeichhe lû chu Mipa a ni a' tih lai hi zawm a pawimawh a ni, a ti. Home Minister chuan Mizoram sawrkar in hmeichhiate dinhmun chawisan a ngaih pawimawh thu pawh sawiin, Aizawl khawpui chhungah All Women Police Station din a ni tawh a. Hmeichhia vekin an enkawl he Police Station-ah hian hmeichhiate laka hleilenna leh hmeichhe case hrang hrang thleng thinah hmeichhe Police hlangin an buaipui vek thei tawh a. Aizawl-ah chauh nilo, District dangah te pawh la din chho zel turin ngaihtuahna sen mek a ni, a ti.
Tunhnaia hri leng mek, COVID-19 chungchang sawiin Home Minister chuan, Mizo mipuite awmze neilova chi-ai lo tur leh, hri laka invenna tura Mizoram sawrkar hmalakna hrang hrangte bengkhawn reng a, tha taka zawm leh tawiawm turin a chah a. Mizoram sawrkarin Mizoram Health Care Scheme a siam te zawm tha turin kalkhawm mipuite a chah bawk. Mizoram hmelma ruihhlo dona kawnga ke pen puiah MHIP te chu sawmin, “Kan fate ruihhlo laka an fihlim theihna tur leh kan fate zirna kawnga hma an sawn zel theihna tur te, an hriselna thlenga enkawl kawngah tan i la ang u,” a ti.
He hunah hian Khual zahawm Assembly Deputy Speaker, Er. Lalrinawma pawhin Mizo nun ah Mizo hmeichhiate hlutna hian hmun a chang thûk hle tih sawiin, hmeichhiate zahawmna leh hlutna chu vawnghim tlat tur kan ni tih a sawi a. Hmeichhiate ngaihhlut zawng in Mizo mipui ah nghawng thui tak a neih avangin hmeichhiate leh naupangte hmasawnna leh himna atan nasa taka tan la theuh turin kalkawmte a chah a. Natna hlauhawm HIV/AIDS dona kawngah pawh theihtawp a tan la turin kalkhawmte a fuih nghal bawk.
Niminpiah atanga neih Tawi tlang Block MHIP Conference hi nimin khan zawhfel niin 'Hmeichhiate leh naupangte hmasawnna leh himna atan nasa taka tan lak' tih chu Conference thupui-ah hman a ni a, niminpiah khan rorelna hun hmang tawhin Agenda 8 chhawpchhuah niin an thurel zingah an Block huamchhungah Mo puanchhawm thin 25 aia tam chhawm lo tura Branch tinin hmalak leh Gutkha product nasa zawka do chungchang te a tel a. Nimin-a Vantlang Inkhawm neih hi an President, R. Lalpekliani chuan kaihruaiin Palai mi 130 vel an tel a ni.

Comments

Popular News (Last 30 Days)