COVID-19(Corona Virus) chungchang sawihona nei

Nimin khan Health Minister, Dr. R. Lalthangliana hovin COVID-19 (Corona Virus) chungchanga thuneihna sang, State Level Task Force on Covid-19 chu thukhawmin, he hri leng mek chungchanga hmalak dan tur hrang hrang an sawiho.
He thutkhawm ah hian Health Minister, Dr. R. Lalthangliana chuan khawvel pumin Coronavirus vanga hri leng hi an buaipui nasa tih sawiin, Mizoram pawh a theih ang angin inven thawn thilah Sawrkar a inpuahchah tawh a, a tul angin heng inpuahchahna te pawh tichak zel a ni dawn tih a sawi a, a vei an awm palh-a enkawl dan tur ruahman a nih tawh thu leh mipuiin Sawrkar an beisei dan ngaihtuaha hma lak a ngaih thu a sawi bawk.
Meeting chuan he natna vei rinhleh te, an In leh lo-in a zirloh avanga harsatna nei te dahhranna turin Primary Health Centres (PHC) ah khum 3 theuh, Community Health Centres (CHC)-ah kum 5 theuh leh Sub-Divisional Hospital (SDH)-ah khum 5 theuh siam nise tih an rel a. Lengpui Airpot atanga passenger lo thleng, he natna vei nia rinhlelhte dahhranna turin Lengpui PHC-a AYUSH building chu a tul anga thuamthat nise tih an rel bawk a. Zokhawthar-ah Survelliance & Screening Centre-ah darkar 24 duty in dah nise tih leh helai duty tur chu Zokhawthar hian awmchilh nise tih te an rel bakah ramdang atanga Mizoram rawn luh theihna khan (Entry point)-a screening tha zawk awm thei nan leh ramdanga atanga lokal mikhual insawisel te chu chak tak hriatchhuah a dahhran a nih thei nan ramri-a awm khaw hrang hranga YMA Branch leh VC te bakah Para-Military Forces te tih tak zeta thawhpui nise an ti bawk.
He Meeting-ah hian he natna chungchanga Training pekna turin Training of Trainers hmanga Delhi a kal mekten a hma thei ang berin H&FW Department leh Private damdawi In-a thawktute training a hma thei ang berah an lo haw hunah training pek nise tih a ni a. Mipui hnena he natna chungchang zirtirna leh awareness hi a zau thei ang ber tihdarh nan hmalak dan tur te pawh rel a ni bawk.
Coronavirus chungchangah hian Sawrkar chuan January ni 31, 2020 khan State Level Task Force dinin chak tak leh a tul angin hmalakna a awm choh zel a. District tinah District Level Task Force chu DC te kaihhruaina hnuaiah din a ni tawh bawk a, anni hian a tul angin hma an la zel bawk a. ZMC-ah kum 32 leh District Hospital tinah kum 5 theuh Isolation Ward atan dah hran a ni a. Lengpui CHC, Aizawl Civil Hospital leh ZMC-ah te Laboratory Sample Collection Centre siam niin Sample lak te Guwahati-ah thawn thei tura tih a ni a. State Level leh District Level-ah te Rapid Response Team din a nih bakah Lengpui Airport-ah uluk takin screening kalpui zel a ni.

Comments

Chhiar Hlawhte