Chapchar Kut urhsun takin hman a ni; Serchhip-ah March 27-ah Chapchar Kut hman a ni ang

Nimin March 6, 2020 kha Mizote Kutpui, Chapchar Kut atan hman a ni a, Mizoram hmun hrang hrangah urhsun taka hman niin Mizoram-a he Kut hmanna pui ber chu Aizawl-ah Chief Minister, Zoramthanga hova neih a ni a. Serchhip-ah chuan tun thla ni 27 khian Chapchar Kut hi hman a ni thung ang.

Mizo ten Kut kan neih pathum zinga tun thlenga kan la hman uar, Chapchar Kut hi kumtin March thla Zirtawpni hmasa berah hmang thin tura sawrkar in ruahmanna a siam angin Vawiin khan Mizoram hmun hrang hrangah urhsun taka hman a ni a. Chapchar Kut hmanna pui ber hi Aizawl Sipai Lammual-ah neih niin Chief Minister, Zoramthanga chuan Kut Pa niin a hmanpui a. Chief Minister chuan ropui leh hlim tlang taka Mizote kutpui Chapchar Kut hman a ni thei chu lawmawm a tih thu sawiin, kumin Kut thupui chu "Zonun zemaw chawisan" a nih angin Zofate chuan khawihmun pawh nise, zonun zemaw chu lanchhuahtir zel tur kan ni, a ti a. Malsawmna kan dawn meichher te, chanchintha kan dawn meichher te, tlawmngaihna meichher te chu chhi engin, State chhung leh pawn mai bakah khawvel zau zawkah kan meichher kan ti eng tur a ni, a ti a. Kan hnam nun tha leh mawi hi midangte tan entawntlak a lo nih theih nan Chapchar Kut a lo thlen hian mitinin midangte entawntlak a nun tum thar leh turin kut hmangtute a chah a ni.
He hunah hian Kut Thlengtu Art & Culture Minister, R. Lalzirliana chuan Chapchar Kut chu Kut hlimawm satliah mai nilovin, inunauna leh inlaichinna tha zawk a lo awm a, mitin lungrual taka induhsaktawn taka an awm hun a nih thu a sawi a. Ruahman lawk ang taka kut hman a ni leh thei chu lawmawm a tih thu sawiin, chhimtute zawng zawng chungah leh ram pawn atanga lo kal zawng zawngte chungah lawmthu a sawi a ni.
Kumin hian Mizoram sawrkar chuan District khawpui hrang hrangah Chapchar Kut hmanna atan hian sum a ruahman a, District Hqrs. thenkhat ah chuan Minister ten he hun hi hman-puiin Chapchar Kut hmanna ah hian Mizo Hnam lam leh zai chi hrang hrang entir a ni a, mipui ten an hlut hle a ni.
Hetihlai hian Serchhip-ah chuan kar hmasa mai-ah Mizoram-a thalai punkhawmna lian ber, K|P General Conference neih a nih avang leh hei vang hian Chapchar Kut atana inbuatsaihna hun a awm loh avangin Chapchar Kut hi tun thla ni 27-a hmang turin Bawrhsap hova Organising Committee thukhawm chuan an rel a. Hei vang hian tun thla ni 27 khian Leisekawt Mual-ah Chap-char Kut hi hman a ni ang.

Comments

Chhiar Hlawhte