Rooftop Solar Plant bun tur zirhona neih a ni

Mizoram hmun hrang hrangah Rooftop Solar Plant bun tura hmalak thawh hnihna (Phase-II) bul tan a ni leh dawn a, he hmalakna Phase-II ah hian Mizoram target chu Kilowatt 500 niin, chenna In (residential area) a huam dawn a ni.

Rooftop Solar chungchang zirhona hi Vawiin khan Aizawl-a P&E Engineer-in-Chief Office, Mizoram New Capital Complex-ah neih niin he hun hi P&E Minister, R. Lalzirliana chuan a hmanpui a. He huna tarlan a nih danin Sawrkar laipui chuan Ni chakna hmanga kawlphetha siamchhuah hna a ngai pawimawh a, kum 2022-ah chuan In chunga dah chi (rooftop solar) hmanga Megawatt 40,000 neih theih a inbeisei a. Nimin-a zirho, Phase-II of Grid Connected Rooftop and Small Solar Power Plant programme pawh hi February ni 19, 2019 khan sawrkar laipuiin a pawm a, Mizoram-ah chuan Power and Electricity Department in he scheme hi a kengkawh dawn a ni.

Ministry of New and Renewable Energy (MNRE) kaihhruaina hnuaiah Government of India in Rooftop Solar Programme a siam hi World Bank chuan a thlawp a, State Bank of India hnenah pawisa puk tirin SBI kaltlang hian he scheme hi kalpui a ni dawn a. Pawisa puk tir bakah MNRE leh World Bank te hian technical thilah tanpuina hna an thawk bawk ang.

Nimin-a he zirhona hunah hian P&E Minister, R. Lalzirliana chuan Power Engineer te fuihin an thiamna leh finnate ram tana hmang zel tur leh inlungrualna leh thawhhona tha chhawmnung zel turin a chah a. India sawrkar chuan ni chakna, thli leh tuikhuah hmanga power siamchhuah a ngai pawimawh a, a bik takin Ni chakna hmanga power siamchhuah tumin nasa takin tan a lak thu a sawi a. Ruahtui tamna Mizoram angah chuan State dang thenkhatte angin Solar Power hi chhawr tangkai viau thei lo mahila, kawlphetha mamawhna engemaw chen a phuhru thei dawn tih sawiin, Solar Power chungchang zir tura sawrkarin Gujarat-a Mizo engineer a tirhte pawh he project atan hian an tangkai hle dawn nia a hriat thu te a sawi bawk.