Ramri-a sumdawnna tur tlawh

Commerce and Industries changtu Minister Dr R. Lalthangliana chuan nimin khan India leh Bangladesh insumdawn tawnna hmun tur, Integrated Check Post (ICP), Kawrpuichhuah a hmalakna kal mek a hmunah kal in a enfiah.
Nimin a Kawrpuichhuah tlawhtu Dr. R. Lalthang-liana hi Tlabung to Kawrpuichhuah kawng siam that leh laih zau hna kal mek thawktu ABCI Infrastructures Private Limited leh a hna viltu MPWD thawktuten lo dawngsawngin an hmalakna te an lo hrilh a. Tlabung to Kawrpuichhuah kawng siam mek hi KM 11.85-a thui niin 2 Lane NH Standard a laih zau leh siam that mek a ni a. He kawng hi World Bank sum hmanga siam niin September 2016 khan thawh tan a ni a. A project cost chu cheng vbc. 83 a ni.
ABCI Infrastructures Private Limited-a Project Manager, RK. Singh-a’n report a pek danin tun dinhmunah hna thawh tur 74.77% zawhfel tawh niin culvert siam ngai 98% zawhfel tawh a ni. Tlabung to Kawrpuichhuah kawng chu ICP Kawrpuichhuah tipuitling turin a pawimawh takzet a ni tiin Minister chuan contractor leh PWD-te chu an hna uluk leh thahnemngai taka kalpui tur leh a hun tiama zo hman ngei tura tan la turin a chah a ni.
ICP Kawrpuichhuah atan hian kum 2005 khan M/s Rites Ltd. ten Home Ministry hnenah an survey report thehlutin he ICP dinna tur hian ram 224.99 bigha a zau lak a ni a. India leh Bang-ladesh inkalpawhna ti awlsam tur hian Kawrpui lui (Theka)-ah RCC Double Lane Bridge siam tum a ni bawk a. He RCC Bridge siamna tur hian Mizoram PWD chuan Sawrkar Laipui Ministry of External Affairs ah cheng vbc. 230.01 hu DPR chu thla hmasa January 17, 2020 khan an lo thehlut tawh a ni. He RCC Double Lane Bridge hmang hian awlsam zawkin Indo-Bang-ladesh insumdawn tawnna kalpui theih a ni ang.

Comments

Chhiar Hlawhte