Reiek Tourist Resort-ah Tourism Minister in Zokhua leh Adventure Park te a hawng

Tourism Minister, Robert Romawia Royte chuan Zirtawpni khan Reiek Tourist Resort-a Zokhua leh Adventure Park a hawng a. Zin mite hip nana Reiek Tlang cheibawlna tur mamawh zualpui siam belh a nih theih nan lungphum a phum bawk.

Heng thil hawn thar leh lungphum phumna puala inkhawm neih ah Tourism Minister chuan Adventure Park leh Zokhua hawn tak te bakah Reiek tlang leh a chhehvel cheibawlna tur cheng nuai 560 senna tur lungphum phum a ni leh ta te chu Mizoram a Tourism hmalakna danglam leh chhinchhiahtlak tak a ni tih sawiin, Reiek chu zin mite hipna hmunpui, ramdang mite hriat hlawh khawpa cheibawl tum a ni tih a sawi a. Tourist destination tak taka siam turin sawrkar bakah Reiek khawtlang mipuiah a hlawhtlinna a innghat thui hle tih sawiin, sawrkarin ruhrel chi hrang hrang a dinte duat turin a chah bawk.

Tourism Minister chuan tunlai khawvel changkang zelah mipuiin hlimna leh chawlh hahdamna hmun tlawh te an uar chho zel tih sawiin, chutiang ang dawngsawng thei tur chuan Tourism Department inbuatsaih a ngai tih a sawi a, “Mizoram chhunga hmun mawi kan neihte khualzin hip nan hman tangkai dan kan thiam a tul a ni,” a ti bawk.

He hunah hian Road and Infrastructure Development Board Vice Chairman, Er. H. Lalzirliana MLA pawhin Mizoram in Reiek Tlang kan nei kan vanneihzia sawiin, India ram hmun dangten Tourism an chhawr tangkai angin kan la chhawr ve ngei dawn, a ti a. Reiek khua te an vannei hle tih sawiin, neitu thinlung puin mikhual dawnsawn dan te thiam turin a fuih a, mipuiin eizawnna tha tak atan an la hmang thuai dawn tih a sawi bawk.

Tourism Minister in a hawn tak project hming hi 'Development of Adventure and Eco-Tourism at Reiek, Mizoram and Development of Adventure Theme Park' tih a ni a. Sawrkar laipui Ministry of Tourism hnuaiah Swadesh Darshan Scheme atanga thawh a ni. Cheng nuai 1350.37 senna he project hi October, 2017 khan thawh tan a ni a, August ni 25, 2019-ah zawh fel a ni. Adventure Park-ah hian High Rope ourse, Zipline, Shooting Range, Climbing Wall, Tarzanland, Spider web, Austrian Trolley leh Body Zorbing te a awm a. Zipline hi hmun thumah dah niin a sang zawk pahnihte hi meter 220 zeta sei a ni a, a hnuai zawk hi meter 150 a sei a ni thung. 

Reiek tlang-a ruhrel mamawh zualpui mihring kalna, lirthei dahna, inthiarna, Street light, khaw thlirna hmun, Amphitheatre cheithatna, Retaining Wall leh pawimawh dang siamna tur atan North East Special Infrastructure Development Scheme (NESIDS) Component-I, cheng nuai 560 senna tur lungphum chu Tourism Minister hian a phum nghal a ni.