MOVCD-NER hnuaia Sawhthing tharchhuah te Agriculture Minister in a vailiam

Agriculture Minister, C. Lalrinsanga chuan Mission Organic Value Chain Development for North Eastern Region (MOVCD-NER) Scheme hnuaia Lunglei Organic Ginger Producer Society in Sawhthing an tharchhuah Metric Ton 40 chu Zirtawpni khan Haulawng atangin a vailiam.

Sawhthing vailiamna puala inkhawm neih ah Agriculture Minister, C. Lalrinsanga chuan Lunglei Organic Ginger Producer Society te hmalakna fakawm a tih thu sawiin, Kan buh leh thlai enkawlna ah Chemical Fertilizer leh hlo thahna damdawi te kan hmang uar lutuk chu a vei takzet thu leh heng te hian kan leilung leh boruak a tihchhiat mai bakah mipuite hriselna thui takin a nghawng a ni, a ti a. Ram changkang zawkte tih dan leh mipui hriselna atana pawimawh tak ‘Organic Farming’ chu Mizoram-ah uar taka kalpui tum a nih thu a sawi bawk.

MOVCD-NER Scheme hi kum 20160-ah Central Sawrkarin India hmarchhak State 8 te tan a ruahman a, Kuthnathawktuten kumtin lo vat-a khamkhawp ngawr ngawr an thar thin chu hlawk zawk leh awmze nei zawka Organic farming hmanga hlawk zawka an tharchhuahte an hralh a sum lakluhna tha zawk an neih theih nan an ruahman a ni a. Tunah hian Mizoram-ah kuthnathawktu intelkhawm (Farmer Producer Company) 14 dinpui tawhin ram hectare 13,000 a zau-ah farmer 14,104 ten ram hlawm hrang hrangah hian thlai thlan bik hmangin hma an la mek a, Kumin chhung hian Organic Certificate an nei theih beisei niin an tharchhuah te chu Organic India Logo tarlangin awmze nei takin sumdawnna an kalpui thei tawh dawn a ni.

Lunglei Organic Ginger Producer Society hian kum 2017 atangin MOVCD-NER Scheme hnuaiah hian Organic Farming-ah hma la in tunah hian khaw 13-ah ram Hectare 679 a zau ah chhungkua 646 in hma an la mek a, Kum 2018-19 chhung khan sawhthing Ton 400 chuang tharchhuakin Farmer ten an sum hmuh belhkhawm chu cheng nuai 150 chuang niin chhut a ni. Tunah hian Lunglei Organic Ginger Producer Society hian AGA Organic Industries te nen agreement siamin a thawh khatna atan Sawhthing Ton 100 an hralhchhuak phawt ang a, hralhchhuah tur an neih dan a zirin rate fel tak siama hralh zel a ni ang.