Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Serchhip tana bawlhhlawh sawngbawlna hmun siam tum STP in Serchhip DUDO an zawtfiah

Serchhip khawpui bawlhhlawh sawngbawlna hmun tur New Serchhip North Village Council ramchhung a siam mek chungchangah nimin khan Serchhip Thalai Pawl (STP) hruaitute chuan UD&PA Department hnuaia Serchhip District Urban Development Officer (DUDO) chu kawmin an hmalakna an zawtfiah.

Nimin-a District Urban Development Officer an kawmna ah hian Serchhip Thalai Pawl (STP) hruaitute chuan Serchhip khawpui tana bawlhhlawh sawngbawlna din tumna hmun hi Serchhip mipuite tui tlan lai, Tuikum lui-a PHE Department tuilâkna chhak/hnâr lama awm a nih avangin Serchhip mipuite tan a himlo thei em tih hriat tumin bawlhhlawh sawngbawl an tum dan an zawtfiah a. District Urban Development Officer, Vanthangpuii chuan bawlhhlawh sawngbawlna hmun thar dinna tur hian Serchhip VC hrang hrangte chu kokhawmin an ramchhungah hmun zawnpui turin an ngen hmasa tih a sawi a, bawlhhlawh sawngbawlna hmun atana an kawhhmuh thenkhatte chu a hmun a rem loh bakah a panna hla deuhte a nih avangin tuna an hmun hi an thlang ta niin a sawi.
DUDO chuan tuna ruahmanna an neih dan chuan bawlhhlawh tawih thei chi chu leitha-ah siam an tum tih a sawi a, hetihlai hian tawih theilo chi sawngbawlna tur ruahmanna a la awm rih loh thu leh tawih theilo chi bawlhhlawh sawngbawlna khâwl an neih hun tur a la hriat theih mai bik loh thu a sawi a, helai hmun hi a hma pawhin sawi neuh neuh a awm avangin hmun dang an zawng leh phawt tih a sawi a, amaherawhchu an duh ang hmundang an hmuh theih mai loh avang leh helai ram bialtu VC-ten Tuikum lui a hlat tho nia an sawi avangin helai hmun hi leiin hma an la zui ta tih a lo hrilh a ni.
STP hruaitute chuan Serchhip khawpui tana bawlhhlawh sawngbawlna hmun tha zawk neih chu an duh thu leh tha an tih thu DUDO an kawmna ah hian sawiin, tuna bawlhhlawh sawng-bawlna hmun din meka bawlhhlawh tawih theite leithaa siam chhuah a nih pawhin Serchhip mipuiten kan tangkaipui ngei an rin thu an sawi a. Hetihlai hian helai hmuna bawlhhlawh tawih theilo sawngbawlna tur ruahmanna a awm nghal loh avangin bawlhhlawh thli-te kan tui tlan mek, Tuikum luiah a luang lût thei dawn nia an ngaih thu an sawi bawk.
STP chuan bawlhhlawh sawngbawlna tur hmun hi tun thla ni 11 an lo tlawh tawh thu sawiin, Google Earth atanga an teh danin bawlhhlawh sawngbawlna tur hmun leh Tuikum-a PHE Department tui lakna hmun inkar hi KM 3 vel chauh a nih avangin, ruah a sur nasat phei chuan rang takin helaia bawlhhlawh thlite hi PHE Department tuilâkna hmun hi a thleng thuai thei dawn nia an hriat thu an sawi a.
PHE Department hian an tui tihthiang-hlimna ah Tui-a natna hrik chu lo that thei pawh nise, bawlhhlawh in Tûr a pai hrang hrang tui-a luang lûtte an thliar hran theih loh chuan Serchhip mipuiten tui thianghlim lo kan tlân mai dawn nia an hriat thu STP chuan thuchhuah siamin an tarlang a. Hei vang hian tuna ruahmanna awm mekah hi chuan helai hmuna bawlhhlawh sawng-bawlna din hi Serchhip mipuite tan a him rih lovah an ngai tih sawiin, “Helaia bawlhhlawh sawngbawlna hmunah hian mihringte tana himlo tur thil hrang hrang pe chhuak lo tura bawlhhlawh te sawngbawl theih a nih dawn loh chuan helai hmuna bawlhhlawh sawngbawlna din tura hmalak mekna hi tawpsana, hmun dang zawng mai turin thuneitute kan ngen tak meuh meuh a ni,” an ti bawk.
Tarlan tawh angin National Green Tribunal chuan rampum a bawlhhlawh paihna hmun (Dumping Ground) chu tibo vek turin ruahmanna a siam a, hemi ang hian Serchhip khawpui bawlhhlawh paihna, Serchhip leh Keitum inkar ami chu titawpin bawlhhlawh sawngbawlna hmun thar, Solid Waste Management Center hi buaipui mek a ni.

Comments

Popular News (Last 30 Days)