Serchhip-ah District Election Officer hovin National Voters Day vawi 10-na hman a ni

Inrinni khan India rampumah National Voters Day vawi 10-na chu hman niin Mizoram-ah pawh District Hqrs. leh SDO (Civil) thuthmun ah te hman a ni a. Serchhip-ah pawh District Election Officer, Dr. Lalzirmawia Chhangte hovin he Ni hi hman a ni.
Serchhip DC Conference Hall-a National Voters Day puala inkhawm ah hian District Bawrhsap leh District Election Officer, Dr. Lalzirmawia Chhangte chuan India ram chu khawvel a Democracy ram lian ber a nih thu sawiin, Democracy rau rau-ah pawh Full Fledge Democracy niin a nghet hle a ni, a ti a. Democracy innghahna pawimawh ber chu Voters te an nih thu sawiin, heng Voters te tana Ni bik hman a ni pawh lawmawm a tih thu a sawi a. Democracy chu a lo chak deuh deuh zel na tur atan Election Commission of India in Inthlanna boruak muanawm tak kalpui thin chu lawmawm a tih thu sawiin, Mizoram-ah pawh inthlanna boruak muanawm tak hnuaia kalpui a nih thin chu State dangte entawn atan pawha vawnnun reng a pawimawh thu a sawi a. Inthlan leh a kaihhnawih hrang hrangah khaw tin leh Veng tina Booth Level Officer (BLO) te chu a thawk nasa ber te zing ami an nih thu pawh sawiin, an thahnem ngaihna ah lawmawm a tih thu a sawi a. Election Commission of India chuan India khua leh tui, Vote nei thei chin ten Vote an neih ngei chu a duh thu pawh sawiin, chutiang atan chuan kumtin mai bakah a chang chuan kumkhat ah vawi 2 te Electoral Roll-a inthunluhna hun te siamin hei mai bakah hian Continous Updation te pawh kalpui a nih thu sawiin, heng te hi khua leh tui te pawhin hman tangkai nachang kan hriat a tul thu a sawi a. Hetiang kawngah pawh hian Serchhip District chu entawntlak kan nih thu leh hei hi chhawmnun zel a pawimawh thu a sawi bawk.
Serchhip-a National Voters Day puala hun hman ah hian nikum September thla atanga November thla chhunga Electoral Verification Programme (EVP) kalpui chhunga hna thawk tha thlanchhuah Booth Level Officer (BLO) te hnenah chawimawina hlan niin lawmman pakhatna chu H. Thangnghinglova, Buangpui BLO chuan dawngin District Election Officer hian Citation leh Rs. 10,000/- a hlan a, lawmman pahnihna chu Lalbiaksiama, BLO Chekawn leh R. Lalmuansanga, BLO Khawbel ten dawngin Citation leh Rs. 7000/- hlan an ni a, lawmman pathumna chu T. Lalengliana, BLO Leng, T. Kaphnuna, BLO Chhiahtlang-V leh Vanlalruata, BLO Serchhip-VI ten dawngin Citation leh Rs. 5000/- hlan an ni bawk.
Serchhip-a National Voters’ Day vawi 10-na puala inkhawm hi Serchhip Election Officer, Vanlalhmachhuana chuan kaihruaiin Serchhip Election Office-a LDC, Lalchharliani kaihhruaina hnuaia he Ni puala Voter thutiam chu kalkhawm ten an chham rual nghal bawk a ni.

Comments

Chhiar Hlawhte

Serchhip-a YMA Branch hrang hrang kum 2020 HRUAITU TE