India Republic Day vawi 71-na Serchhip-ah Bawrhsap hovin hman a ni

India Republic Day vawi 71-na chu nimin, January 26, 2020 khan ramchhung hmun hrang hrangah urhsun taka hman a ni a, Serchhip-ah pawh DC Playground, Khawtetlang-ah District Bawrhsap, Dr. Lalzirmawia Chhangte chuan India Hnam puanzar pawt parhin Parade Chibai buk a chhanglet a, mipuite hnenah thuchah a sawi bawk.

Serchhip-a India Republic Day hmanna ah hian District Bawrhsap, Dr. Lalzirmawia Chhangte chuan mipuite Republic Day chibai bukin, India mipuite duhthusam, Sovereign, Socialist, Secular, Democratic Republic ram ni tura Danpui (Constitution) lo duang chhuaktu hruaitu hmasa te zahna chibai a buk a. Ram Danpui fel tak, remna leh muanna boruak nuam tak te kan neih avangin Mizoram chuan hma kan sawn chak hle tih sawiin, Serchhip District pawh India rama literacy rate sang ber District kan nih tak thu a sawi a. Kan District tana thawktu NGO leh Kohhran pawl hrang hrang leh Chanchinbu mi ten tha taka sawrkar an thawhpui tawh thinna ah lawmthu a sawi bawk.
District Bawrhsap chuan Serchhip District chhunga hmasawnna hna thawh hrang hrang te tarlangin, PMGSY hnuaia hnathawh- Chhingchhip to Thentlang, Hmuntha to Khawbel, Chhingchhip to Hualtu, Chhingchhip to Hmuntha, East Lungdar to Sailulak leh Chekawn to Lungchhuan kawng te chu tunhnai mai khan zawhfel a nih thu leh Thentlang to Sialhau ta, Serchhip to Hriangtlang, Chekawn to Sialsir leh Khawlailung to Piler te chu thawh mek niin Central Road Fund hmangin Tuichang Lei dawh hna pawh thawh mek a nih thu a sawi a. Hei bakah hian Chawmkai-ah Bailey Bridge dawh mek a nih thu leh Tuichangral panna kawng siamthat mek te sawiin, kum 2019-2020 chhungin District chhung hmun hrang hrang 22-ah kawngpui thawmthat hna thawh a nih thu leh hna chi hrang 19 zawh a nih tawh thu a sawi bawk.
District Bawrhsap chuan hriselna lamah nasa taka hmalak a nih thu sawiin, Nu nau chunga boral an awmloh thu a sawi a, Primary School leh Middle School zirlai naupangte hnenah zirlaibu leh Uniform a thlawna sem a nih bakah naupang 6272 te chu Mid-Day Meal pek mek an nih thu a sawi a. Police Department hnuaiah kum 2019 chhungin mi 100 lakah thubuai ziahluh a nih thu leh mi 72 te chu chargesheet niin mi 27 te convict an nih thu a sawi a. Excise & Narcotics Department in Zu leh ruihhlo thahnem tak man an neih thu pawh sawiin, ram mipuiten eizawnna kawngah hma an sawn theih nan sawrkar in hmalakna engemaw zat a kalpui thu a sawi bawk.
Kum 2019 chungin Mat phai, Zawlpui zau-ah loneitute thlai tharchhuah cheng nuai 410 man hralhchhuah a nih thu pawh Bawrhsap chuan sawiin, Micro Irrigation per Drop More Crop hnuaiah ram hectare 168.55-a zau-ah Drip Irrigation leh Sprinkler Irrigation atan hmalak mek a nih thu a sawi a. National Food Security Mission hnuaiah District chhunga khaw 13-ah Vaimim tha chi chin tira hmalak mek a nih thu leh an tharchhuah te Kg. ah Rs. 15 zela leisak nghal an nih dawn thu a sawi bawk.
Heng bakah hian Rural Development Department hnuaia hmalakna te pawh tarlangin, MGNREGS hnuaiah ni 81 inhlawhna siam a nih tawh thu a sawi a, UD&PA Department leh PHE Department hnuaiah Faina kawnga hma-lakna leh hlawhtlinna te pawh tarlangin, PMMVY hnuaiah nau 551 te hnenah tanpuina cheng nuai 25 chuang semchhuah a nih tawh thu a sawi a. District Local Administration Officer (DLAO) Serchhip pawhin kum 2019 chhungin Ran chhiah Rs. 1,07,250/- hmuh a nih thu leh NEDP atanga cheng nuai 530 chu khaw hrang hranga hma-sawnna hna thawh nan hman a nih thu a sawi bawk.
Nimin a Serchhip-a Republic Day lawmna ah hian Serchhp-a sawrkar Department hrang hranga thawk te leh sawmbik mi thahnem tak an tel a ni.

Republic Day Parade nei
Nimin a Serchhip-a India Republic Day vawi 71-na lawmna ah Parade Contingent 7 ten SI Hrangchhuana leh SI H. Lalkhuma te kaihhruaina hnuaiah March past an nei a, heng Contingent 7 te hi Un-Armed Contingent 2 leh School Contingent 5 niin kumin hian a vawikhatna atan Marian High school-a School Police Cadet te chu an tel a ni. March Past-ah hian a pumpui-ah School Police Cadet te hi pakhatna niin Govt. JM H/S chu pahnihna an ni a, NCC Govt. H/S Serchhip chu pathumna an ni bawk.

Comments

Chhiar Hlawhte

Serchhip-a YMA Branch hrang hrang kum 2020 HRUAITU TE