Para-Gliding World Cup neihna tur hmun Adviser to Chief Minister in a tlawh

Thla thar-a Serchhip khua in Para-Gliding Accuracy World Cup and Grand Festival a thlenna hmun tur Bawngchawm tlang chu nimin khan Adviser to Chief Minister, C. Lalramzauva chuan tlawhin chak zawka hmalak tul a tih thu a sawi a. Sum pawh tam zawk hmuh beisei a nih thu a sawi bawk.

Thla tharFebruary ni 13 atanga Serchhip in Para-Gliding Accuracy World Cup and Grand Festival a thlen tur neihna tur hmun a tlawhna ah hian Adviser to Chief Minister, C. Lalramzauva chuan helai hmuna Building sak hna thawk mektu, Saha Construction Coy-a hotute chu kovin an hnathawh mek chu beisei anga a chak tawkloh thu a sawi a. Helai hmun enkawltute chuan tunhnaia ramchhunga buaina tenau awm neuh neuh avangin an bungrua te duh anga a rawn thlen mumal theih loh thu leh NH. 54 atanga lakchhohna kawng ah harsatna a awm bawk avangin Serchhip rawn thlenpui tawh te pawh a dahna tur hmun an thlenpui kim theih rihloh thu an sawi a. Amaherawh chu he intihsiakna neih tur hun a thlen hma ngeia engkim peihfel hman erawh an beisei thu an sawi a. Mizoram Aero-Sports Association (MASA) Sub-Hqrs. Serchhip President, C. Lalhminghlua pawhin helai hmuna hnathawh hi chak taka kalpui zel a nih thu sawiin, he building sak hna hi duh anga peihfel a nih loh pawhin he intihsiakna Serchhip in a thlen turah nghawng thalo a neih dawnloh thu leh he building tello pawh hian hlawhtling taka thlen theih a nih dawn thu a sawi bawk.
Adviser to Chief Minister, C. Lalramzauva chuan Serchhip-a neih tur Para-Gliding World Cup atana Organising Committee thutkhawm thu bawhzuiin NEC atangin pawisa cheng nuai 20 hmuh a nih dawn thu leh hemi atang hian cheng nuai 16 chu pawisafai-a dawn anih tawh leh cheng nuai 4 la awm erawh release ala nih rihloh thu a sawi a. Mizoram sawrkar pawhin he intihsiakna liantham tak Mizoram in a thlen tur hi Mizoram hmel lanna tur anih anga a tha thei ang ber a thlen anih theih nan cheng nuai 50 chu Mizoram sawrkar in an tum dawn thu leh Chief Minister pawhin hei hi a ngaih pawimawh thu a sawi bawk.
Adviser to Chief Minister hian nimin tlai khan he World Cup thlen tura Bawngchawm tlang atanga thlawkchhuak te tumna tur hmun enin Zawlpui a tlawh a, hemi atan hian ram hi tihfel la awm lovin mimal ram lei a nih dawn nge, man chawia hawh a nih dawn pawh tihchian ala awmlo bawk a ni.

Comments

Chhiar Hlawhte