Latest News

MZP ten Mizoram Lok Sabha MP Lengpui-ah Pawndum nen an lo hmuak

Mizoram Lok Sabha MP, C. Lalrosanga chuan nimin khan Aizawl rawn thlengin Citizenship Amendment Bill (CAB) thlawp zawnga vote a thlak avangin, a laka lungawi loh lantirna atan MZP chuan Lengpui Airport-ah pawndum nen an lo hmuak a. MNF mi leh sa engemawzat pawhin Lok Sahbha MP hi an lo hmuak ve bawk a ni.

Parliament \hutkhawm a Citizenship Amendment Bill (CAB) sawihona neih a nih hnua Mizoram Lok Sabha MP in Mizoram a rawn thlen Ni hian MZP chuan Lengpui Airport-ah lo hmuakin CAB thlawp zawnga Vote a pek avanga an dem thu leh bang tura an phut thu an lo aupui a, Airport tual-a inkhawm tawi an buatsaihah MZP President, B. Vanlaltana chuan Citizenship Amendment Act (CAA) an do avangin MNF-ten an party an do anga an ngai \hin chu mak a tih thu sawiin, “Nationalist party inti siin hetianga min ngai hi BJP nen an thawkdun tak tak em ni kan ti \hin. Khawi party tan mah kan thawk lo,” a ti.
MZP President chuan BJP thil tum, Hindu lalram siam chu a chian thu sawiin, “Hnam tlemte kan ni a, kan ram leh hnam himna atan kan \anrual a ngai. Phak ang tawkin, a \ha bera kan ngaih angin hma kan la,” a ti a, an chak em vang leh hman em vanga CAA chu do an nih bik loh thu a sawi a. Ram leh hnam tan theihtawp an chhuahzel tur thu sawiin, CAA chungchang hi January ni 22, 2020-ah Supreme Court-a ngaihtuah leh a nih dawn thu leh Court in a hnawl ngei theihna turin Mizo mipuite \awng\aipui turin a sawm a. “Thil \haah chuan sawrkar pawh kan thlawp ang a, ram leh hnam tana \ha lo tur chu kan do zel dawn. Kan MP pawh hian uluk takin ngaihtuahse CAB hi a thlawpin ka ring lo,” a ti bawk.
He hunah hian North East Students’ Organisation (NESO) Fin. Secretary, Ricky Lalbiakmawia pawhin CAA chu CAB anih lai a\angin hmarchhak state dangah Mizoram aia nasa zawkin an do nia sawiin, “Khawiah mah a dotute an party do angin an ngai ngai lo. Sawrkar kan do lo CAB kan do,” tiin tu party fuihpawrh mah an nih loh thu a sawi bawk.
Hetihlai hian Lok Sabha MP hi MNF Party pawhin Vice President, Lalthlengliana hova hmuakin General Secretary leh \halai hruai-tute bakah Media Cell lam hotute an tel a, ‘Lok Sabha MP Pu C.Lalrosanga dam reng rawh se’ tiin an aurual thung a. Hemi hnu hian MP hi ven-himna \ha tak nen Aizawl thlenpui a ni.

Comments

Popular News (Last 30 Days)