Mizoram Police dincham lawm

Mizoram Police Raising Day vawi 48-na lawmna chu nimin khan Aizawl-a G.S. Arya Mess, PHQ kawt-ah neih niin Home Minister, Lalchamliana chuan a hmanpui a ni.
Nimin a Mizoram Police Raising Day lawmna ah hian Home Minister hian Beat Patrolling System hawngin Mizoram Annual Report, 2019 pawh a tlangzarh bakah kum khat chhunga Police Station titha zual pathum- Champhai Police Station, Lawngtlai Police Station, Khawzawl Police Station te hnenah lawmpuina leh pawisa fai a hlan nghal bawk a ni.
Mizoram Police hi January 21, 1972-ah Mizo District a nih laia din a ni a, a tirah chuan Aizawl Police Headquarters hnuaiah Unit 4- Aizawl DEF, Lunglei DEF, Chhim-tuipui DEF leh CID (SB) a awm a. Armed Battallion neih a ni nghal lo a, District SP hnuaiah District Armed Branch a awm thung a ni. Police Station pawh 6 chauh a tirah awmin, mi 200 vel thawktu an awm a. Tun dinhmunah hian Range 3 awmin, District 11-ah SP Rank Officer in dah a ni a, Police Station 40, Special Police Station 3 (Cyber Crime, Special Narcotic leh All Women Police Station), Police Outpost 16, Armed Police Battalions 8, Battalion Border Outpost 23, Police Training School 1 leh SP Rank Officer enkawlna hnuaiah Unit dang 5 a awm bawk a ni. Mizoram Police Sanctioned Strength 12292 a ni a, Actual Strength 9006 (73.27%) niin, Vacancy awmzat 3286 (26.73%)a ni.
Mizoram Police te hian ralthuam, inbiak-pawhna changkang, invenhimna tha tak tak an nei bakah Cyber-Forensic Laboratory-cum-Training Centre, Canine Squad te pawh CID (Crime) hnuaiah neih a ni bawk a ni. Nimin thleng khan ram tana nunna chan hi mi 56 an awm a, thawk tha leh Police Medal dawng 341 an awm tawh bawk a ni.

Comments

Chhiar Hlawhte