Kum 2019 chhungin meizu mi 289 man an ni

Serchhip District Anti-Tobacco Squad chuan kum 2019 chhung khan Squad Drive tum 81 zet neiin dan bawhchhia mi 289 zet an man.
National Tobacco Control Programme (NTCP) hnuaia din, Serchhip District Anti-Tobacco Squad hian vaihlo leh a kaihhnawih khuahkhirhna Dan, COTPA kenkawh hna thawkin kum kalta (2019) chhung khan puipunna hmuna mei zu dapchhuah hna leh dan phalloh a Sikret leh Vaihlo dang zawrhchhuah te dapin Squad Drive tum 81 zet an nei a, heng Squad Drive an neih ah hian puipunna hmun hrang hrang bakah sawrkar Pisa te tlawhin heng ah hian Dan bawhchhia mi 289 man an ni a, heng mite hi Dan in a phut angin pawisa chawitir thin an ni bawk.
Nikum chhung vek khan Tobacco Control Awareness Programme hnuaiah School leh College-ah te tum 94 zet hun hman niin tlawmngai pawl leh Kohhran-ah tum 31 zet Awareness Programme hman a ni bawk a. Hei bakah hian Vaihlo leh a kaihhnawih nghei duhte tan Serchhip-ah Tobacco Cessation Clinic (TCC) hawn niin nikum chhung khan mipa 142 leh hmeichhia 253, an vaiin mi 395 ten TCC hi an pan a, he Centre pantu mipa 29 leh hmeichhia 37, an vaiin mi 66 te chuan vaihlo leh a kaihhnawih hi an nghei bawk a ni.
National Tobacco Control Programme (NTCP) hi Serchhip District-ah hian District Nodal Officer, Dr. Lalhlunpuii kaihhruaina hnuaiah kalpui mek niin District Consultant, Psychologist/Counselor, Social Worker leh Data Entry Operator te an awm mek a ni.

Comments

Chhiar Hlawhte