I&PR Minister in Sawrkar hmalakna mipui hriattir ram hmasawnna atana thil tul a nih thu a sawi

Information & Public Relations Minister, Lalruatkima chuan Sawrkar thuchhuah, sawrkar hmalakna leh sawrkar hmachhawp hrang hrangte mipui hnena hriattir hi thil pawimawh tak, sawrkar hnathawh ti chaktu leh ram hmasawnna atana thil tul a nih thu a sawi.

Information & Public Relations Department (I&PR) leh Mizoram Journalist Association (MJA) ten kum 2020 kum bul inhlantharna hun nimin a Aizawl-a I&PR Auditorium-a an buatsaih a hmanpuina ah he thu hi sawiin I&PR Minister chuan I&PR leh thuthar thehdarhtu, MJA member te chu thawkho an nih angin an inpawhtlan pawh a pawimawh hle tih a sawi a. Sawrkarin Chanchinbumite rawngbawlna pawimawh zia a hriat thu leh duhsak pawh a duhsak hle tih sawiin, “Chanchinbumite inzirna leh ti bengvar tur atan tangkai takin Press Study Tour te pawh sawrkarin a ruahman chho mek zel a. Mipui zirtirtu, sawrkar hmalakna te puangzartu leh mipuite ti bengvartu an nih angin Chanchinbumite tana Press Study Tour leh training buatsaih te chhunzawm hi sawrkar chuan a ngai pawimawh a ni,” a ti.

MJA te hamthatna tur atana ruahmanna Mizoram Journalists Contributary Pension Scheme, Advertisement Rate thar leh Press Enclave te pawh a hlawhtlin thuai theihna turin sawrkarin chak takin hma a la mek tih I&PR Minister chuan sawiin, chuvangin chanchinbumite pawhin sawrkarin mipuite tana hriattur pawimawh leh hamthatna a duan chung-changa thuchhuah, sawrkar Press Release kaltlanga an chhuah thin te pawh uar zawka an chhuah sak zel an beisei thu a sawi a. Tunlaiin Social Media kaltlanga thu thehdarh a awlsam avangin hrechiang mang lo leh chianna nei hmasa lova chanchin leh thil thleng thenkhat thehdarh leh pekchhawn zung zung te a hluar hle tih pawh sawiin, hemi kawngah pawh hian chanchinbumite chu thuchiang leh belhchiandawl zawk mipuite hriattir kawngah tun aia tan an lak nasat zual pawh a ngai dawn tih a sawi bawk.

He hunah hian I&PR Director, Lallianpuii chuan I&PR Department leh Chanchinbumite inlaichinna hrisel neih chhunzawm zel a pawimawhna hriat thar leh a that thu a sawi a. MJA General Hqrs. President, Zonunsanga pawhin Sawrkarin Chanchinbumite tih hmasawnna leh hamthatna tura hma a lakna zawng zawngah lawmthu a sawi bawk a. Chanchinbumite intahhriamna tura Study Tour te, Training leh Workshop buatsaihte pawh a hlawkthlak em avangin chhunzawm zel turin sawrkar a ngen a, Sawrkar Policy puanzar leh hnathawh te mipui hriattir kawngah pawh theihtawp an chhuah thin thu a sawi a. Sawrkar hmalakna zirchianna leh mipuite tih bengvarna atana thil tangkai tak Project Sites visit te pawh sawrkar lamin rem a tih phawt chuan chanchinbumite chu an inpeih sa reng tih a sawi bawk.