Career Conclave neih a ni

Serchhip District Bawrhsap Pisa leh District Child Protection Unit (DCPU) Serchhip tang-kawp buatsaihin nimin khan Serchhip Auditorium-ah 'Career Conclave' neih a ni.

Serchhip khawpui chhunga High School leh Higher Secondary School Zirlai naupangte tana 'Career Conclave' neih hi Serchhip District Child Protection Officer, Lalsiampuii chuan kaihruaiin District Level Task Force Committee on Beti Bachao Beti Padhao in hmalakna tur atana rua-hmanna a lo siam lawk tawh anga zirlai naupang ten an hma lam hun atana ruahmanna tha an neih a, eng kawng nge zawh se an tan tha ang tih an thlan thiam theih nana hetiang hun hi buatsaih an nih thu a sawi.

He hun hi hlawm hnih-ah then niin hun hmasa lamah Dr. Laldinliana, Associate Professor, MZU chuan thusawiin, ngaihtuahna them-thiam kan neih a tul a ni, a ti a. Zirlai naupangte chu an zirlaibu leh tunlaia thil thleng mekte a chin-chhuaka hre ve tura ngaihtuah peih chuan nakin zelah a hranpa taka inzir leh ngai lovin an hriatna tipungtu tha tak anih theih thu a sawi a. ‘A theih loh’ ti mai lovin a theih dan kawng zawn peih a tul a, mi thlir loh dan zawka thlir chin a tul chang pawh awm thin a ni, a ti bawk. Chawhnu lamah LTL. Fela, IIM Lucknow, Chief Manager, Aditya Birla Capital HI-DIGITAL chuan zirlai kalkhawm te chu zirtirna a pe ve thung a, zirlai naupangte tan tum mumal tak nei-a lehkha zir a pawimawh thu sawiin, zirlaite chu an nih tum hrang hrang an thlen theihna tura inbuatsaih dan hrang hrangte a zirtir bawk a ni.