Bawrhsap thar in thuthar thehdarhtute a kawm

Serchhip District tan theihtawp ka chhuah ang - DC, Serchhip


Serchhip District Bawrhsap, Dr. Lalzirmawia Chhangte chuan nimin khan Serchhip District MJA Member te a Pisa-a leng-ah sawmin inkawmna an nei a. He hunah hian Bawrhsap chuan Serchhip District tan theihtawp chhuah a tum thu a sawi.

Serchhip District Bawrhsap thar in nimin-a a Pisa-a MJA member te a kawmna hunah hian Bawrhsap, Dr. Lalzirmawia Chhangte chuan thuthar thehdarhtute chu mipuite zirtirtu an nih avanga ngaih pawimawh hmasak-ah a neih thu sawiin, thawhhona tha an neih theihna tura inkawmna hun tha tak an nei thei chu lawmawm a tih thu a sawi a. Sawrkar hna thawkin hmun hrang hrangah a lo awm tawh thu sawiin, Serchhip-ah a awm thei chu lawmawm a tih thu a sawi a. Serchhip District chu Hnamdang in an chenpawlh lutuk loh leh ramdang leh State dang nen pawha ramri nei manglo leh harsatna lian tak awm ngailohna, District dang ten harsatna an neih hrang hrang ang te pawh neih ve ngaihlohna a nih thu a sawi a. Hei vang hian Development lama hmalak chu a tih tur ni deuh mai-ah a ngaih thu sawiin, lawm takin Serchhip-ah a rawn awm thu leh sawrkar thuneitute duhsakna a dawng nia a in ngaih thu a sawi bawk.
He hunah hian MJA Serchhip District President, C. Ramengmawia chuan Bawrhsap thar chu MJA ten an lo awm tih sawiin, thawhhona tha tak an neih zel a beisei thu leh Serchhip khawtlang leh District hmasawnna tur chuan theihtawp an chhuah zel dawn thu a sawi bawk.
He inkawmna ah hian Serchhip khawtlang leh District tana an ngaih pawimawh hrang hrang sawihona neiin Ran khuahkhirh chungchangah Dan anga hmalak a pawimawh rualin thawktu leh hmanrua chungchang avanga duh anga hmalak a harsat thu leh VC, tlawmngai pawl leh District thuneitute nen tangtlanga hmalak tul an tih thu te, Serchhip khawpui chhunga NH. 54 kawng chhia chungchang ah he kawng hi NHIDCL kut-a lut tawh a nih avang leh kawngpui laihzauh turin Serchhip khua chu hel dawn mah se a siamthat hna chu NHIDCL kut-a awm tho a nih thu leh tunah hian a vaia siam tha tur chuan harsatna an la neih thu te sawilan a ni a. Hei bakah hian Sports Complex chungchang te leh District chhunga khaw hrang hrangte tlawhchhuah chungchang pawh sawilan niin District Bawrhsap chuan, Serchhip District tan theihtawp a chhuah dawn thu sawiin, District chhunga khua te a tam thei ang ber tlawh a tum dawn thu a sawi bawk.
He inkawmna ah hian District Bawrh-sap hi Addl. DC, Chuauhnuna leh SDO (Sadar), C. Lalduhzuali ten an tawiawm a, Serchhip-a MJA member te pawh an tel tha hle a ni.

Comments

Chhiar Hlawhte