SHC-ah MNF leh HPC \angdun in hnehna an chang

Sinlung Hills Council (SHC) inthlan vawikhatna chu neih zawh a ni ta a, Seat 12 awmna ah MNF in seat 6 lain Seat la hnem ber an ni.

Mizoram sawrkar leh HPC (D) ten inremna an ziah tih hlawhtlinna kal zelah Mizoram sawrkar in Sinlung Hills Council dinin inthlanna hmasa ber chu neih zawh a ni ta a, he inthlanna hmasa berah hian niminpiah khan mipui ten Vote thlakin nizan hmasa khan Vote tla te hi chhiar nghal a ni a. MNF chu Party mala seat la hnem ber niin Seat 12 awmah seat 6 an la a, MNF in seat 4 lain Congress leh ZPM tangdunin seat 1 an la a, Independent Candidate 1 in seat 1 a la bawk a ni. MNF leh HPC hian inthlan hma in thawhdunna an tifel hman a, SHC-a sawrkarna siam turin seat 7 a ngai a, MNF in party malin seat 6 la in sawrkar-na siam thei lo mah se HPC nen tangdunin seat 10 an la phak tho a ni. Sinlung Hills Council hruaitu turte hi mi sawmpahnih (12) thlan chhuah an ni bakah, Sawrkar aiawh mi 2 ruat an ni bawk dawn a, an vaiin member 14 an awm dawn a ni.

MNF Party chuan Sinlung Hills Council inthlan vawi khatna neih zawh takah MNF leh HPC thawkhoin hnehna sang tak, Constituency 12-a seat 10 la a hnehna a chang chu lawmawm an tih thu thuchhuah siamin an tarlang a. He inthlana Vote thlaktu mipui zawng zawng chungah lawmthu sawiin, inthlan felfai leh thianghlim neih theihna tura tha thawhtu zawng zawng chungah pawh lawmthu an sawi bawk.

Mizoram Pradesh Congress Committee (MPCC) pawhin he inthlanna neih zawh taka an Candidate leh an thawhpui Candidate te chungah lawmthu sawiin, Party tana mahni tha leh zung, sum leh pai senga beitu te zawng zawng chungah lawmthu an sawi a. Congress party chuan remna leh muanna a ngaih pawimawh avangin ralmuang taka Sinlung Hills Council inthlan kan nei thei chu an lawm hle tih tarlangin, Remna leh muanna tibuai zawnga che an awm loh avangin inthlan chuhtu zawng zawngte chungah lawmthu an sawi a. Inthlan a awm leh hma chu insiksawi lo a, tluang taka sawrkar a kal theih nan Sinlung Hills Council sawrkar thar chu duhsakna an hlan bawk.

Hetihlai hian ZPM pawhin nimin khan thuchhuah siamin Sinlung Hills Council inthlan zawh takah hian ZPM chuan Official Candidate siam lovin SHC area-a ZPM mipuite zalenna (free hand)-ah a dah avangin eng party mah ZPM-in a thawhpui lo tih an tarlang a. SHC Area-a ZPM mipui duhdanin bial thenkhatah ZPM mi Independent-a an din thu leh Party thenkhat-in an thlawp thu tarlangin, Bial li (4) ah SHC area-a ZPM te duhdan angin Independent candidate thlawpna pek an ni tih an tarlang a. ZPM mi, Independent-a dingte lo thlawptu party leh mimala thlawptu zawng zawng chungah lawmthu an sawi bawk.