Khawzawl District thar lawmna CM hovin neih a n

Khawzawl khua chuan nimin khan District thar an neih lawmna an nei a. He hun hi Chief Minister, Zoramthanga chuan khuallian niin a hmanpui a ni.
Khawzawl Field No. I-a Khawzawl District lawmna hunah hian Chief Minister, Zoramthanga chuan Khawzawl District tihpuitlin a ni chu a lawm a ni tih sawiin, District thar mipuite duhsakna chibai a buk a. Sawrkar in a tum angin District function tirin, chumi hnu ah kawng chi hrang hrangin hmalakna chhawp chhoh zel a ni tih sawiin, tihpuitlin ngai te tipuitling tura bawhzui zel a nih thu a sawi a. Khawzawl leh District thar dang pahnih ah te chuan sawrkar building hrang hrang leh thawktute tihfel chhoh mek a nih thu leh hmabak dang la awm zawng zawng te pawh theihtawp chhuah a tihfel a nih tur thu a sawi a. Khawchhak lamin kawng tha an mamawhna a hriatpui thu Chief Minister chuan sawiin, sawrkarin kawng tha a awm theih nan theihtawpin hma a lak thu a sawi bawk.
Chief Minister chuan Pathian in malsawmna min pek, kan hriatchhuah zawh loh, la tam si hi kan hman tangkai thiam a tul tih sawiin, Leilung tha, a chhung a chengte chawm zo ram zau tak, boruak thianghlim, sik leh sa nuam tak ram kan neih hi kan hman tangkai theih chuan ei leh in-ah intodelhna a thlen bakah chhungtin sum lakluh a pun phah dawn a ni, a ti a. Chumi atan chuan mipui kan inbuatsaih a, kan thlir thiam a pawimawh a ni, tiin ram tana thawh puiah kalkhawmte a sawm a. Khawzawl District chuan hma a sawn zel a duhsak thu a sawi bawk.
He hunah hian Khual Zahawm, Deputy Chief Minister leh bialtu MLA ni bawk, Tawnluia pawhin hun rei tak District nihna chang tura hmalakna in a taka hlawhtlinna a hmu ta chu a lawm thu sawiin, sawrkar-a Minister leh Department hrang hranga thawktuten a tul anga Khawzawl District hmasawnna atan neitu nihna thinlung pu chunga hma an lakna ah lawmthu a sawi a. District thar lawmna ah District tihchangtlun nana hmalakna kalpui tura Department hrang hrang hotute an tel chu lawmawm a tih thu sawiin, phurawm zual a tih thu a sawi a. Deputy Chief Minister chuan District nihnaah duhtawk mai lovin, hmalam khawhkaitirtu ni zawk se tiin, Khawzawl District chu District thang duang tak leh kawng hrang hranga District dangte tana entawn tlak ni turin, khawtlang hruaitute leh mipuite chu tan la tlang a thawhhopuiah a sawm bawk.
Khawzawl District thar lawmna inkhawm hi K. Lalzika, Khawzawl District Celebration Committee Chairman chuan a kaihruai a. KDCC Secretary Lalzuiliana Ralte chuan Khawzawl District tihpuitlin nana hmalakna te report pe in, Khawzawl District tihpuitlin nana theihtawp chhuahtu mi 7 te chawimawi an ni bawk. Khawzawl District lawmna atan hian Khawzawl-a Veng 14 ah District thar lawmna ruai buatsaih a ni.

Comments

Chhiar Hlawhte