Serchhip-a eirawngbawlna Gas harsatna a ziaawm chhoh zel beisei a ni

MIZOFED (LPG) Serchhip Branch-a thawk te chuan kumin chho-a Serchhip in eirawngbawlna Gas lama harsatna a tawh chu sutkian a ni mek tih sawiin, hun reilote ah hnianghnar taka Gas hi sem theih an beisei thu an sawi.
MIZOFED Serchhip Branch-a thawktute chuan kumin chho ah eirawngbawlna Gas hi an dawn thatloh avangin mipui ten harsatna an tawh thu leh an hnuaiah hian Gas Consumers mi 12,000 vel an awm thu sawiin, heng mite hian hnianghnar taka eirawngbawlna Gas an hmuh theih nan thlatin Trip 14-16 vel an mamawh thu an sawi a, amaherawh chu sawrkar kum kal mekah hetiang zat dawn hi thla kalta, October thla chiah khan an la neih thu an sawi a. Hei vang hian mipui ten harsatna hi an tawk tih sawiin, October thla ah chawhruala an mamawh zat an dawn hian harsatna zualpui chu a sutkian thu leh hetiang zat hi tun thla ah an dawng leh thei a nih chuan mipuite harsatna zualpui chu sutkian a nih an rin thu an sawi a ni.
MIZOFED Serchhip Branch-a thawk te chuan kumin sawrkar kum kal mek thla sarih (7) chhungin eirawngbawlna Gas hi Trip 82 an dawn tawh thu sawiin, hetah hian Domestic Cylinder 23,883 leh Commercial Cylinder 840 an dawn tawh thu an sawi a, thla tin Trip 14-16 vel mamawh an nih lai hian April thla ah Trip 11 dawngin May thla ah Trip 12 leh June thla ah Trip 13 dawngin, July thla ah Trip 11 an dawn thu an sawi a, August thla ah phei chuan Trip 9 chauh an dawn thu leh September thla ah Trip 10 dawngin October thla ah chuan Trip 16 an dawn hman thu an sawi a. Tun thla kal mek, November thla ah hian eirawngbawlna Gas dawn la neilo thungin, amaherawh chu kawng lakah Trip thum (3) rawn kal mek a awm thu leh heng te hi reilote ah rawn thleng mai tura beisei a nih thu an sawi a. Tunhnaiah IOCL hotu ten Mizoram sawrkar thuneitute hnenah nitin Trip 22 Mizoram-a rawn thawn an tum thu an sawi avangin harsatna hi sutkian theih beiseina a sang zual tih an sawi.
Hei bakah hian MIZOFED Serchhip Branch Manager, FC. Malsawmtluanga chuan hun engemaw chen Serchhip in eirawngbawlna Gas kan lakna hmun, Mualkhang Bottling Plant chu eirawngbawlna Gas a pekchhuah theih zat tihhniam sak a nih avangin Mizoram chhimlam District pathum te a chawm tak thu leh Serchhip pawhin Borkhola Bottling Plant atangin Gas hi kan lak tak ber thu a sawi a. Amaherawh chu Mualkhang Bottling Plant hotute dawrin a remchan dan anga Gas hi phurh ve zel a nih thu a sawi bawk.

Comments

Chhiar Hlawhte