SBCC in hma la zui mek zel

Serchhip Beautification and Cleanliness Committee chuan Serchhip khawpui alo mawia mipuite tan pawh thlir nuam a nih theihna tura hma an lakna kal mekah UD&PA Department atanga sum an hmuh leh an member te sum thawh-khawm atangin Serchhip Bazar, Taxi Stand Opposite a lungrem chu tunlai hian rawng an hnawih mek a, SBBC hruaitute chuan helai hmun hi Serchhip khawpui chhunga hmun lunlai ber leh langsar ber anih avanga an ngaih pawimawh thu leh mipuite pawhin felfai leh thianghlim takin enkawl se an duh thu an sawi.

SBCC hruaitute chuan helai hmunah hian signboard leh hording tam tak tar a nih thu leh a then te phei chu tangkaina nei tawhlo leh chhe tak tak te a nih avanga engemaw zat chu a tartu te an biak hnuah an paih thu an sawi a. Hetiang thil tar thin te pawhin an thil tar te an mamawh hun leh tar tur hun a liam chuan senghawi leh thin se an duh thu an sawi a. Tuna Serchhip Bazar rawng an hnawih mek bakah hian Serchhip DC Office Peng-a lungrem pawh rawng hnawih leh an tum thu an sawi bawk.
SBCC hruaitute chuan Serchhip mipui, a bikin NH. 54 kawngpui kam a awmte chu an In leh lungrem te December 25, 2019 hmaa rawng hnawih thar tura an ngen thu pawh sawiin, he an ngenna hi mi tam tak chuan an zawm mek thu leh lawmawm an tih thu an sawi a. Tuna rawng la hnawih thar hman lo te pawhin kan khawpui chhung mawina atan rawng hi hnawih thar hram se an duh thu an sawi bawk.

Comments

Chhiar Hlawhte