Sawrkar hnathawk kut phuar phelh a ngai tih sawi

ZPM General Secretary, Phairothanga chuan sawrkar hnathawk te kut phuar phelh a ngai tih sawiin, “Kalphung thlak a ngai a ni,” a ti.

Nimin a ZPM in Aizawl-a an Office-a Chhung Inkhawm an neih ah ZPM General Secretary, Phairothanga chuan Mizoram hmun hrang hranga kawngpui pawimawhte hi te a tlo lo em em nia sawiin, “PMGSY kawng tam tak kum khat pawh daihlo kawngpui kan nei thin hi a veiawm em em a ni,” a ti.

ZPM General Secretary chuan State danga an hman ve tho, IIT Kharagpur approved Technology kan hman thu sawiin, “SOR te kan hmang diklo nge, kan engineer te an thiam lo bik em ni ang? Ni love, kan engineer rualte hi lehkha thiam thei tak tak, Engineering College tha tak taka mark sang tak tak hmu, mithiam tak tak te an ni a, nungchang tha leh Pathian tih tak tak te an ni a, ram leh hnam, khawtlang veina ah pawh kan tluklohte an ni hial zawk. Mahse, kan sawrkar hnarkaitu Minister-te leh contractor-te sam inphiar zawm leh hnungthak inhiah tawn avangin sawrkar hnathawkte kut phuar an ni a, sawrkar hnathawk kutphuar phelh a ngai a, kalphung thlak a ngai a ni” a ti.

Phairothanga chuan PWD in Zuangtui-ah Quality Control Division neiin Lunglei-ah Sub Division an nei bawk tih sawiin, “Heng ah hian Laboratory tha tak tak a awm a, contractor ten an lung hman tur te, an cement hman tur te leh a dangte an certified tir thin. Mahse, chung an hmanraw hman tur an certified chu an hmang tak tak em? An thawk tha em tih entu Project Implementation Unit (PIU) lam kutphuar an ni leh thin si,” a ti a. Hei bakah hian kawng siam an zawh hian hna zo an la ni lo tih sawiin, “An hnathawh chu an vil zui tur a nih laiin a endiktu tur sawrkar hnathawk te kutphuar an nih thin avangin Defect Liability Period-ah contractor te chu kan Officer-ten an ko thei lova, a tawpah mipuiin kan tuar ta thin a ni,” a ti bawk.