Rubber and Allied Crops Development Board in SEDP-a hmalakna tura ruahman an thlirho

Mizoram sawrkar-a Rubber and Allied Crops Development Board chu nimin khan an Chairman leh Land Resources, Soil & Water Conservation Minister, R. Lalzirliana hova thukhawmin SEDP hnuaia Board hma lak tum dan leh hmachhawp hrang hrangte thlirho a ni.

Land Resources, Soil & Water Conservation Minister, R. Lalzirliana hova a Pisa-a Rubber & Allied Crops Development & Board thut-khawm ah hian Meeting kaihruaitu R. Lalzirliana chuan Department ten Board Member Secretary, Valbuanga hova rang taka an hma lakna tur proposal tha tak an siam chu lawmawm a tih thu sawiin, Development Board zinga hma lakna tur ruahmanna pharh thei hmasa pawl an nih a rin thu a sawi a. Board Vice Chairman, Lalrinsanga Ralte chuan tharchhuah reng rengah, a hralhna market hi a pawimawh ber tih sawiin, hei vang hian a hralhchhuahna lamah Market Linkage an siam a pawimawh dawn tih a sawi a, chutiang hawi zawnga a tir atanga hengte pawh ruahmanna in a huam tel tha a tih thu a sawi bawk.

He hunah hian Land Resources, Soil & Water Conservation Secretary, Valbuanga Rubber & Allied Crops Development Board, Member Secretary ni bawk chuan SEDP hnuaia Board hmalak tum dan leh hmachhawp te sawiin, hma lakna tur ruahmanna an lo duan chhin te pharhin chungte chu a sawifiah a. Rubber bika hma lakna tur chu kum 10 atan duan chin niin a kum khatna ah Kolasib, Mamit leh Lunglei District, Rubber thatna hmun ah te kalpui tura Department in a ruahman chu Board chuan tha an ti a. Member thenkhat te chuan Cluster leh chhungkaw behchanna ruahmanna te hi kalpui tha an tih thu pawh sawiin, Link Road pawimawhna pawh Meeting-a sawilan niin hei hi Department dangte nena sawiho a, a ruala convergence a kalpui dan zawn tha an tih thu Member te hian an sawi bawk a ni. 

Board in SEDP kaltlanga hmalak a tum ruahmanna te chu - rubber behchan a loneitute leh thingtlang lamah awmte tan eizawnna siamsak thei tur project cheng vbc. 1659.34 te; Mizoram a Coffee chinna hmunhma te tizauhna tur leh Coffee kung natna in a tihchhiat te thlak a, a thar chinna tur project cheng vbc. 85.87 te; Hmunphiah chin belhna tur project cheng vbc. 107.47 te; Kuhva chinna hmun tih zauh leh a sawng-bawlna tur project cheng vbc. 81.64 te leh ruahtui avanga ram chhe thei tur venna ni paha loneitute tangkaipui thei tur project cheng vbc. 109.05 te an ni.