MJA hruaitu ten Civil Hospital Lunglei an tlawh

MJA Gen Hqrs. Aizawl President, Zonunsanga Khiangte leh a thawhpuite chuan nimin khan Civil Hospital Lunglei an tlawh a, damdawi In dinhmun hrang hrang an zirchiang.

Heng MJA member te hi District Medical Superintendent, Dr. SR. Ngurchamliana chuan lo dawngsawngin Civil Hospital dinhmun a lo hrilh a. Civil Hospital Lunglei hi kum 1900 khan Khum 20 nena bul tan niin tunah hian khum 160 a awm mek a, Doctor Specialist 17, Medical Officer (MBBS) 5, Medical Officer (AYUSH) 3, Dental Surgeons 2 an awm a, Nursing Superintendent 2, Ward Superintendent 3, Staff Nurse (regular) 34, Contract 27 an awm a, Technician, Group D, Office Staff leh Driver 70 chuang an awm bawk a ni. He Hospital-ah hian August 2018 khan CT Scan bunin tunah hian nitin damlo 4 bawr vel en ziah ang an ni a, Oxygen Generating Plant install mek a ni a, Nov. 13, 2019-a an enchhinah chuan a nih dan tur dik takin he plant hian hna a thawk a. Oxygen pipeline 70 leh suction pipeline 40 vuah a ni tawh a ni.

He Hospital-ah hian department hrang hrang leh Speciality hrang hrang a awm vek laiin, Pediatric tih lohah chuan Doctor pakhat theuh an awm a, damlo tam zualna department Medicine, Gynaecology, Surgery leh Anaesthesialogy-ah te Doctor indaihlohna a na hle a, Specialist kher lo pawh dah belh an mamawh hle tih a sawi a. Casualty darkar 24 a function laiin, Doctor bik an awm lova, mahni department theuh enkawl chungin Doctor ten an in duty chhawk a, Casualty bik atan Doctor an mamawhna a sang hle tih a sawi bawk.