Mizoram-ah Rashtriya Ekta Diwa hman a ni

India rampumah nimin khan National Unity Day – Rashtriya Ekta Diwas 2019 hman a ni a, Aizawl-ah pawh nimin zing khan Assam Rifles Lammual-ah Deputy Chief Minister, Tawnluia hovin he Ni pual hian hun hman a ni.

Rashtriya Ekta Diwas puala inkhawm ah hian Deputy Chief Minister, Tawnluia chuan India Hnam inpum-khatna atana nasa taka hma la tu, Sardar Vallabhbhai Patel-a piancham denchhenin October ni 31 chu Rashtriya Ekta Diwas (Hnam Inpumkhatna Ni)-ah India sawrkar chuan puangin kum 2014 a\angin hman a nih thu a sawi a. Kum 1917-ah Sardar Vallabhbhai Patel chuan India Hnam Pa Mahatma Gandhi thusawi a ngaihthlak a\angin India Hnam tan theihtawp a chhuah a, huaisen taka thawk mi, ‘Iron Man of India’ ti hiala koh \hin a ni, a ti a. British in India a chhuahsan dawn khan India lal ram hrang hrang 500 chuang India chhunga an awmkhawm theih nan hma a la tih sawiin, India zalenna sual chhuaktute zinga mi pawi-mawh Sardar Vallabhbhai Patel ang hian Hnam tana thawk turin leh inpumkhatna vawng nung zel turin kalkhawmte a sawm bawk.

He hunah hian Mizoram Chief Secretary, Lalnunmawia Chuaungo chuan he hun hmang tura kalkhawm te chu Rashtriya Ekta Diwas thutiam a chham tir a. India Hnam Hla sak a nih bakah Contingent 9 te an parade bawk a ni. Rashtriya Ekta Diwas lawmna atan hian nimin dar 7:00 khan Sikul naupang 500 ten Sikulpuikawn leh Chanmari a\angin Run for Unity neiin, AR Ground-ah an in tawkkhawm a ni.

Rashtriya Ekta Diwas hi District khawpui hrang hrangah te pawh hman a ni a, Serchhip ah chuan Nehru Yuva Kendra (NYK) Sangathan te buatsahin nizan khan he Ni pual hian hun hman a ni a, he hunah hian mithiam ten India rama Hnam hrang hrangte inpumkhat a pawimawh zia an zirtir bawk a ni.