KTP General Conference Pandal sakna tur hmanrua Serchhip rawn thlenpui a ni

Nakum February thla a Serchhip in KTP General Conference vawi 58-na a dawn tur atana Pandal sakna tur Structure chu Serchhip rawn thlenpui tan niin kumthar lamah Pandal sak hna hi thawh tan a ni ang.

Nakum February thla a Serchhip in KTP General Conference a thlen tur atan hian inbuatsaihna ngawrh taka kalpui mek zel niin Inkhawmpui neih atana Pandal sakna tur hmanrua, Pandal Structure chu Inrinni khan Aizawl atanga rawn chhuahpui a nih hnuah nimin zing khan Serchhip rawn thlenpui niin KTP member ten hnatlang in an hlangthla a, KTP General Conference Pandal sakna atan hian Pandal Structure awmsa chu a that tawkloh avangin Synod Pandal Structure thar siam turin a ruahman a, he Pandal Structure siam tur hian KL Fabrication, Mission Veng te chu thlan an niin anni hian Pandal Structure thar hi thla 5 chhungin an siam zo a ni.

He Pandal Stucture thar hi a dung ft. 165 leh a vang ft. 252.7 a lian a ni a, lamtual 108x30ft. awm tura ruahman a nih bakah Stage 72x30ft a zau leh Green Room 72x15ft. awm tura ruahman a ni bawk a. Pandal sak dan turah hian BDO Office lamah Stage awm tura ruahman a ni a, tuna Mual awmsa ah hian Pandal Structure hi khat tawk vel tura ngaih a ni. He Pandal Stucture tharah hian mi 10,000 vel leng tura ngaih a ni a, Pandal Structure thar a nih angin tun tum hi an hman hmasakna ber tur a ni ang.

KTP General Conference neihna tura Pandal Structure hi a vaiin Truck 5 hmanga rawn phurh niin heng Pandal Structure te hi Serchhip khawpui chhunga KTP Member ten hnatlang in an hlangthla a, Mual-ah hian dahfel nghal niin a siamtu KL Fabrication, Mission Veng te bawk hian a sak/remkhawm hna hi an thawk leh dawn a, a design en milin Engineer ten a remkhawm hna hi an thawk dawn a, chawlhkar hnih (2) chhunga remfel hman beisei niin kumthar (2020) kumtir ah a remkhawm hna hi thawh a ni dawn a, hemi hnu hian Pandal cheimawi hna chu thawh chhunzawm leh tur a ni dawn a ni.

Hetihlai hian he Conference neih tur atan hian Committee peng hrang hrangte pawhin an chanpual theuh ah ngawrh takin hma an la mek a, nimin tlai khan Information & Publicity Sub-Committee chu thukhawmin hmalakna tur hrang hrang an duan bakah hmalak tawhna te an thlirlet nghal bawk.