Children's Day lo thleng tur pualin Serchhip-ah ‘Children's Week 2019’ hman mek a ni

Tunkar Ningani-a Children's Day lo thleng tur pualin ‘Children's Week 2019’ chu hman mek a ni a, nimin khan Serchhip-ah he Hapta pual hian Rally neih a nih bakah HIV/AIDS leh ruihhlo hmansual laka inven dan zirhona neih a ni.

‘Childrens Week 2019’ hman mek hnuaiah hian nimin chawhma lam khan District Child Protection Unit (DCPU), District Legal Services Authority (DLSA) leh Project Himna-Serchhip Against Drugs, Alcohol & Tobacco (SADAT) buatsaihin Serchhip khawpui chhunga High School leh Middle School zirlai naupangte tan zirlai naupang te zuk leh hmuam, ruihtheih thil laka an fihlim theihna tura hmalakna leh inzirtirna atan Serchhip AOC Veng atanga Serchhip Auditorium thleng Rally neih a ni a, he Rally-ah hian ‘Happy Childhood-Preventing Children from HIV/AIDS and Drug Abuse’ tih chu thupui ah hman niin he Rally-a tel te hi District Bawrhsap, Sangchhin Chinzah chuan a vailiam a. He Rally-ah hian Serchhip khawpui chhunga zirlai thahnem tak telin zirlai naupangte hian zuk leh hmuam thatlohna leh HIV/AIDS laka fihlim a pawimawh zia inziahna thuziak hrang hrangte an kenglang bawk a ni.

He Rally neih zawh a nih hnu hian Rally-a tel te tan hian Serchhip Auditorium-ah zuk leh hmuam thatlohna leh HIV/AIDS laka fimkhur a pawimawh zia inzirtirna chu neih nghal niin he hun hi District Child Protection Officer, Lalsiampuii chuan a kaihruai a, he hun hi Serchhip SP, R. Sathiyasundaram IPS chuan khuallian nia hmanpuiin zirlai naupang kalkhawm te chu zuk leh hmuam leh ruihtheih thil kaihhnawih chi hrang hrang laka filhlim tura fuihin, heng ruihhlo tawlhrutute leh zuartute hremna Dan hrang hrangte a sawi bakah, mihring hrisel leh mi puitling ni tura an nitin nunkawng uluk taka hmang turin a chah bawk.

Hemi hnu hian Project Himna-MADAT (Mizoram Against Drugs Alcohol Tobacco) atangin Dr. Zodinmawii chuan zirlai naupang te chu zuk leh hmuam, ruihtheih thil thatlohna chi hrang hrang a lem nen entirin a zirtir a, Lucy Lalremruati Chhangte, Chief Fuctionary, Gan Sabra Society Aizawl chuan HIV/AIDS laka naupangte an him theihna tur leh inven dan turte bakah Dan hnuaia naupangte venhimna chungchang a zirtir bawk a ni.

‘Childrens Week 2019’ hman mek pual hian Vawiin chawhma dar 10:00 atang hian Serchhip Auditorium-ah ‘Our Children are Our Future-Role of Parents and Teachers’ tih thupui hmangin hun hman leh a ni dawn a, he hunah hian Serchhip SDEO, Vanlalchhana chu khuallian a ni ang.