Latest News

Assam-a NRC kalpui hnuah Kolasib District-a Temporary ILP pekchhuah nasa takin a tlahniam

Assam State-a National Registration of Citizen (NRC) in India kalpui a nih hnuah Kolasib District chhunga ILP Counter hrang hrang atanga Temporary ILP pekchhuah chu nasa takin a tlahniam a. ILP pekchhuahna Counter hrang hrang ah hian thawktu indaih lo chu an harsatna lian ber a ni thung.

Mizoram Journalist Association (MJA) Kolasib District Member te chuan Inrinni khan Kolasib District-a ILP Counter awmna- Vairengte, Phaisen leh Bairabi te tlawhin Temporary ILP an pekchhuah dan an zawtfiah a. Temporary ILP an pekchhuah report atanga a lan danin Assam a NRC an kalpui hnuah an District chhunga ILP Counter hrang hranga Temporary ILP pekchhuah hi nasa takin a tlahniam a. Mizoram luhna pui ber Vairengte-ah chuan August thla khan Temporary ILP hi 9128 an pechhuak a. September-ah 7842 an pechhuak a, October-ah 6850 an pechuak leh bawk a. Assam a NRC an kalpui hnuah Temporary ILP pekchhuah hi a tlem zel a ni.
Bairabi-ah pawh Temporary ILP an pekchhuah hi a tlahniam nasa tih thawktute chuan an sawi a. NRC kalpui a nih hma kha chuan thlatin Temporary ILP hi 2,500 atanga 3000 vel an pekchhuah thin laiin thla hmasa khan 1500 chauh an pechhuak a nih thu an sawi bawk.
Kolasib District-a ILP pekchhuahna Counter hrang hrang ah hian thawktu indaihlo chu an harsatna lian ber a ni a. ILP Counter te hi darkar 24 chhung hawn a nih laiin Vairengte-ah hian thawktu 3 chauh an awm a. Bairabi-ah hian mi 2 chauh an awm bawk a. Phaisen hi chu IR Police duty ten Temporary ILP hi an pekchhuah avangin duty apiang kutah a awm thung a ni.
Vairengte bikah hian ILP Counter leh Police Check-Gate inhnaih lutuk chuan harsatna a siam tih Isaac C. Lalrempuia, SDO (C) Vairengte chuan MJA te hi hrilhin, ILP laktum a nghak an tam thin avangin Traffic a tibuai a, ILP lakchhuah nghak lova a ruk a tlang theihna chance a tam a, Police te hi an fimkhur em avangin ILP neilo tlang ru an tlem zawk a ni, a ti bawk.
Vairengte SDO (Civil) chuan ILP Temporary a la an tam ngaihtuahin District hrang hrang a DC Office atanga ILP pangngai la an tlem thu pawh sawiin, Temporary chauh nei, a taka ILP la ta lo an awm em tih hi uluk zawka enfiah nise chuan tun aiin ILP atanga Chhiah hmuh a tam tur thu leh ILP hmang diklo emaw, ILP neilo emaw an tlem tur thu a sawi bawk.
Bairabi-ah hian ILP Counter hi Assam lam atanga Railway Station thlen hma in a awm a. Railway Station-ah hian ILP Counter hi awm tur a nih laiin tunlai hian an kalpui lo niin thawktute chuan an sawi a. Rel atanga hnamdang lo kalte chuan ILP siam tir tur hian Counter hi an pan mai thin niin an sawi.
Temporary ILP pekchhuahna Counter hrang hrangah hian ILP pakhat ah hian Sawrkar ah Rs. 100 zel Revenue chhun a ni a. Phaisen bik hi Police in ILP hi an pekchhuah avangin an sum hmuh hi SP Kolasib Office-ah an chhung a, SP Office hian DC Kolasib-ah an chhung ve leh mai thin a ni.
ILP counter a thawktute chuan Assam atanga lo kal te chu NRC a an chuan leh chuan loh an enfiah zel hnuah NRC chuang lo te chu an thawnlet zel thu an sawi a. NRC an chuan leh chuan loh hi an ARN number atangin an en a, an chhungkaw hming list enin reject an awm pawhin an kaltlang tir ngai lo tih an sawi bawk.
ILP Counter a thawktute chuan Tourist chu an harsatna a nih thu an sawi a. ILP ngai ah hian Tourist hi ziahtel a nih loh avangin Tourist tan a ngailo ti an awm thin thu an sawi a. Hei bakah hian NRC chu Supreme Court-ah an khin mek avangin tun atan ala rintlak loh ti a tan khawh te pawh an awm thin thu an sawi bawk.

Comments

Popular News (Last 30 Days)