Serchhip khawpui chu ODF Plus ni turin Final Declaration siam a ni ta

Serchhip Town Sanitation Task Force chu nimin khan District Bawrhsap, Sangchhin Chinzah hova \hukhawmin September ni 6, 2019-a Serchhip khawpui Open Defecation Free (ODF) Plus ni tura Preliminary Declaration an lo puan tawh chu sawiselna pakhatmah a luh loh avangin Final Declaration siam a ni.

Serchhip DC Meeting Hall-a Serchhip Town Sanitation Task Force \hutkhawm ah hian District Bawrhsap leh Chairman ni bawk, Sangchhin Chinzah chuan tunhnaiah Serchhip chuan District khawpui fai ber lawmman a dawn thu Member te hmaah sawiin, Serchhip in District khawpui fai ber lawmman a dawng chu thil chhinchhiah tlak, hriatreng tawh tur thil a nih thu a sawi a. He lawmman ropui tak kan dawn theihna chhanah mimal tumah kawh bik tur awm lovin Serchhip a cheng khua leh tui zawng zawng, Village Council zawng zawng, tlawmngai pawl zawng zawng, sawrkar hnathawk zawng zawng; mitin inpekna vang a ni, a ti a. “Lawmman dawn ringawt hi kan tum ber leh kan lawmna a ni tur a ni lova, faina nghet taka nunpui hi kan thiltum zawk a ni tur a ni,” a ti. Bawrhsap chuan a huhova faina hnatlang neia thawk reng chungin mahni a kan awmin faina chu kan hlamchhiah leh hlauh thei tih pawh sawiin, mitin te mahni in en a, mite entawn tlaka nung \heuh turin a chah bawk.

He \hutkhawm ah hian District Urban Developmnent Officer, Vanthangpuii chuan September ni 6, 2019-a ODF Plus khawpuia Serchhip lo inpuan tawhna (Preliminary Declaration) kal zelah dan anga nitin chanchinbu pahnih-ah puanzar a nih thu sawiin, huntiam chhunga sawiselna engmah dawn a nih loh thu a sawi a. Hemi hnu hian District Bawrhsap, Sangchhin Chinzah chuan Village Council aiawh members te chu ODF Plus-a Serchhip a inpuan lohna chhan tur harsatna nei an awm leh awm loh a zawt nawn leh vek a. Harsatna nei tumah an awm loh avangin Open Defecation Free Plus (ODF+) Final Resolution chu a sign ta a ni. He inpuanna hi thuneitu sang zawkah thlen a ni anga, dan angin an la rawn endik leh dawn a ni.

Nimin-a Serchhip Town Sanitation Task Force \hukhawm hian Faina Hapta-2019 kharna leh Serchhip in District khawpui fai ber lawmman a lak lawmna chu Oct. 9, 2019 khian Serchhip Auditorium-ah neih nise an ti bawk a, hun hman dan tur tlangpui pawh an duang nghal bawk.