Serchhip in khawpui fai ber lawmman a lak lawmna neiin Faina Hapta khar a ni

Serchhip Town Sanitation Task Force huaihawtin nimin khan Serchhip Auditorium-ah Mizoram khawpui fai inelna a Serchhip Town in District khawpui fai ber lawmman a lak lawmna neiin Faina Hapta kharna neih a ni a, he hun hi District Bawrhsap, Sangchhin Chinzah chuan a hmanpui a ni.

Serchhip Auditorium-a nimin chawhnu lama he hun hmanna ah hian District Bawrhsap leh Serchhip Town Sanitation Task Force Chairman, Sangchhin Chinzah chuan District khawpui fai ber kan nih theih nana theihtawp chhuahtu Serchhip mipuite zawng zawng chungah lawmthu sawiin, he lawmman kan dawn theihna bul chu mi pahnih khat \hahnem ngai fal te vang nilovin, mipui zawng zawngten thukhat vuaa fai kan tum vang a ni, a ti a. Tun \uma pakhatna lawmman kan lak hnuah nakumah pakhatna kan chelh zui lovang tih hlauva a aia nasa zawka bei turin he huna tel te chu a fuih a, nakumah pawh pakhatna nih zui zel kan tumin kan inbuatsaih sauh sauh tur a ni, tiin kalkhawm mipuite a fuih bawk. District Bawrhsap chuan kan thinlungin faina a duh takzet chuan kan taksain chu kawng chu a zawh mai a ni, a ti a. Fai pawimawh zia sawrkarin a hriat avangin Faina inzirtir uarna Hapta a siam \hin a, tunah hian he Hapta kharna hun chu nei mah ila, Faina lama hmalakna chu nasa zawkin kan bei chho zel dawn tih a sawi bawk.
He hunah hian District Bawrhsap hian ‘YMA Chhang Faina Project-2019’ hnuaia YMA Chhang ten an Veng faina tura hma an lakna hnuaia Branch YMA Fai thlanchhuah te hnenah lawmman hlanin Serchhip Hmar Veng Branch YMA in lawmman pakhatna dawngin Chhim Veng Branch in pahnihna leh Chhiahtlang Chanmari Branch YMA in lawmman pathumna an dawng a. Heng bakah hian Serchhip Kawnpui North Branch, Serchhip Kawnpui South Branch leh Serchhip Field Veng Branch ten Consolation Prize an dawng bawk a ni.
Serchhip DIPRO, K. Saitluanga kaih-hruai he inkhawm ah hian Serchhip Town Sanitation Task Force chuan faina kawnga nasa taka hma latu Lalduhawma, Serchhip Venglai hnenah chawimawina hlan a ni a. Lalduhawma hi tunhma a Zoram dung leh vangin ‘One Man Band-a’ tia an hriat lar \hin kha niin ani hian lawmman leh thilpek engmah phut nei lovin kum tam tak chhung Serchhip Bazar leh a chhehvel te hi a lo phiat fai tawh \hin a, zing khawvar tirh a\anga tlai thim thlengin a thawk \hin a. Kum dangah pawh ani hnenah hian thilpek hlan a lo ni tawh \hin a, nimin ah pawh a bikin Sanitation Task Force hian Rs. 5000 a hlan leh a, hei bakah hian Thupui Sawihona (Whatsapp) Group Member ten sum leh pai thawhkhawmin Rs. 21,500 an hlan ve bawk a, Serchhip-IV Village Council ten Citation leh Rs. 5000 an hlan bawk a ni.
He hunah hian Serchhip District Urban Development Officer, Vanthangpuii, chuan Serchhip khawpuiin Faina lawmman a dawn theih nana hmalak dan tlangpui report pein he inelnaah hian Full Mark 100-ah Serchhip chuan Mark 88-a hmuh thu a tarlang a, kumina hmalakna ah a bik takin YMA Chhang leh zirlai naupang lamin tha an thawh nasat thusawiin, YMA Chhang leh zirlai naupang nasa zawka thawhpui an nih chhan pawh nakin zela kan fate thinlunga faina tuhngheh tumna pakhat a nih thute a sawi a. Hmalakna hrang hrang tarlanna video te pawh thlirho nghal a ni.
He hunah hian Serchhip Town Village Council aiawhin H. Saichhinga,  MUP District Hqrs. aiawin CL. Ramngaia leh MHIP Sub-Hqrs. Serchhip aiawhin Sanghmingliani te pawhin faina kawnga nasa lehzuala hmalak a \ul thu te an sawi a. Zaithiam zai hrang hrangte ngaihthlak niin Serchhip Sub-Hqrs. YMA President, R. Sang-hmingthanga’n lawmthu sawina hun a hmang bawk.

Comments

Popular posts from this blog

PAN CARD an tih teh fo hi - Laldinpuia