Right to Information (RTI) Week pualin Chief Minister hovin hun hman a ni

Kumtin rampum huapa October ni 5 -12 chhunga Right to Information (RTI) Week hman \hin chu kumin pawh hian hman leh mek niin nimin khan Chief Minister, Zoramthanga hovin Synod Conference Centre-ah he Hapta pual hian hun hman a ni.
RTI hnuaia mipuiin an chanvo an hriatchiana an hman \angkai thar leh theih nana ruahman RTI Week puala inkhawm ah hian Chief Minister chuan langtlang taka sawrkar hmalakna te mipuiin an hriatpui theihna chu sawrkar rinawm a nih thu leh, chumi tihlawhtling tura RTI hmang \angkai theia kan awm chu mipui vanneihna a nih thu a sawi a. Sawrkar lama thawktute pawh an fimkhur phah zawkin, zep neih ngailo a hnathawh chu a tu tan pawh a hahdamtlak in a nuam zawk bawk a ni, a ti a. Chutihrual chuan RTI chu a nih dan tur ang taka hman a pawimawh thu sawiin, mi pawisawi tumna emaw, tute tan emaw a hnawksak siam tumna hmanrua tur a nih loh thu a sawi bawk. Chief Minister chuan sawrkar hnathawk information pechhuaktute pawh \ha taka an mawhphurna hlenchhuak \hin tura chahin, \hangtharte vanneihna RTI chu \angkai taka hman chhoh zel a beisei thu leh, engtik ni ah emaw chuan RTI hman ngailo khawp a sawrkar inrelbawlna \ha a la awm ngei a beisei thu a sawi bawk.
Aizawl-a RTI Week puala inkhawm hi Information Commissioner, Zorammuana, IPS (Rtd.) chuan kaihruaiin Chief Information Commissioner, Lalduhthlana Ralte, IFS (Rtd.) chuan Right to Information Act \obul leh he Dan hnuaia mipuite chanvo hrang hrangte a sawi a, sawrkar Department tina RTI zawhna lo bawhzuitute chu \an la zual tura fuihin, sawrkar inrelbawlna \ha zawk siamna hmanrua pawimawh an nih thu a sawi bawk.
RTI Week pual hian nimin vek khan Champhai leh Lawngtlai-ah pawh hun hman niin Champhai-a he Hapta puala inkhawm hmanpuitu District Bawrhsap, Dr. Naveen Aggarwal, IAS chuan Right to Information Act chu India khua leh tui tawh phawt ten Sawrkarah hriat duh an neihte an zawh theihna tura duan dan a nih mai bakah zawhna dawngtu Department-te pawhin hunbi tuk chhung ngeia chhanna an pek theihna tura dan siam a ni tih a sawi a. Lawngtlai-a he Hapta puala inkhawm hmanpuitu District Bawrhsap, Shashanka Ala-i chuan mipuite'n an theihna zawn \heuhva sawrkar an thawhpui theih nan sawrkar ruahmanna leh a hnathawhte an hriat a pawimawh thu leh chu chu RTI-in a tum pawh a nih thu a sawi bawk.

Comments

Popular posts from this blog

PAN CARD an tih teh fo hi - Laldinpuia