Health Care Scheme-ah huam zau takin mipuite tan ruahmanna kalpui a ni - Health Minister

Health Minister, Dr. R. Lalthangliana chuan Mizoram State Health Care Scheme thar chu a hmaa Health Care Scheme, natna thlan bik tlemte chauha Bill theih ang kha ni tawh lovin huam zau takin mipuite tan ruahmanna kalpui a ni tih sawiin, inziaklut turin mipuite chu a sawm bawk.

Nimin a Aizawl Mizo Hnam Run-a MNF Chhung Inkhawm neih ah Health Minister, Dr. R. Lalthangliana hian thu sawiin Mizoram khua leh tui te chu BPL leh BPL lo te tan kumtin cheng nuai hnih Bill theihna tur, Mizoram State Health Care Scheme-ah inziaklut zel turin a sawm a, Mizoram Health Care Scheme hnuaiah hian BPL tan Rs. 100/- leh BPL lo tan Rs. 1000/- in a inziahluh theih tih a sawi bawk. Health Minister chuan MNF sawrkar hmasa tawp lamah Health Care Scheme hi kalpui \an a nih thu sawiin, “MNF sawrkar hmasa in Asian Development Bank a\anga sum kan hmuh Health Care sum a lo dah, a pung nen cheng vbc. 150 chuang lai mai a lo awm a. Kum 10 Congress sawrkar khan an lo hre miah lo nge, heti zat mipui tana ham\hatna nasa tak thlen tur sum hre lo Health Minister, Finance Minister leh Chief Minister kan lo nei kha a mak hle a ni,” a ti bawk.

Health Minister chuan Mizoram State Health Care Scheme thar chu SEDP tihhlawhtlinna point pawimawh tak a nih thu sawiin, “SEDP-ah natna huam zau zawka Health Care Scheme kalpui a nih tur thu hi kan ziak a. Chutiang tak chu Chief Minister-in a hawng ta a, a lawmawm takzet a. Health Care Scheme hi Golden Card ngai chi Central Scheme kha a awm a, kum khata nuai 5 bill theihna a ni a, tuna kan sawi mek hi chu Mizoram State bik pual a ni. Hemi chunngchangah hian kan Chief Minister Pu Zoramthanga inphalna a ropui takzet a, kan mamawh ang zelin vaibelchhe 100 thleng pawhin Health Care sum atan hian dah turin a inhawn thu a sawi a ni,’ a ti bawk.

Health Minister chuan a department chana report \henkhat pein Cancer Hospital-a Cancer hemna khawl chhe tawh lutuk chu cheng vbc. 11 vel sengin a thar lei a nih dawn mek thu a sawi a. “A dahna tur hmunhma pawh buatsaih \an mek a ni a. Cancer Speciallity Hospital Japan Funding hnuaiah vbc. 500 vel senga din turin JICA-in a approve tawh a. Cancer enkawlna chungchangah NE State dangte kan kal khalh thei ve tawh hial turah kan ngai. Tin, RIPAN tihchangtlunna tur cheng vbc. 480 lai kan hmuh a\angin nasa takin RIPAN tihchangtlun hna kalpui mek a ni,” a ti bawk.

Kar hmasa lama Central sawkar dawra a kal chungchang pawh sawiin Dr. R. Lalthang-liana chuan Human Resources Development Ministry lam a dawr thu leh Hindi zirtirtu 1000 chuang an pek leh theih tur thu an lo hrilh tih a sawi a. “Mizoram puma Hospital Building chhe tawh tak takte thuam\hatna tur sum tam tham tak dil mek a ni a. Sub-Centre 400 chuang kan neih mek thuam\hat a, tihchangtlunna tur te pawh buaipui mek a ni,” a ti a. “Zoram Medical College (ZMC) enkawlna pawh hi a hautak tham dawn hle a. Kumtin Doctor zirlai 100 neih zel tur a ni a, Vbc. 30 vel bawr man Hostel sak a ngai a. Tun a\anga kum 4-ah College puitlinga hlankai theih chauh tur, kawng hrang hranga endik mek kan ni a, thawh tur leh sum senna tur a tam hle a. Hemi kawnga Chief Minister inhawnna leh hma a lakna hi a ropui takzet a ni,” a ti bawk.

MNF Vice President ni bawk Dr. R. Lalthangliana chuan Chief Minister, Zoramthanga chuan CAB doa hma a lakna kawngah leh Zoram a enkawl dan kawng hrang hrangah Pa nih a tlin em em nia sawiin, “Hmarchhak State dang Chief Minister-te pawhin Pa enin an en a, zah pawh a kai takzet a, Central lam dawr kawngah phei chuan theihna bik riau a nei a ni,” a ti bawk.