Mipui hmaa puangchhuak ve turin MPYCC in phut

Mizoram Pradesh Youth Congress Committee (MPYCC) chuan Chief Minister Zoram-thanga leh Minister, Dr. R. Lalthangliana te chu corruption laka an fihlim a nih chuan an fihlim zia te Zoram mipui hmaa puang chhuak ve tura an phut thu an sawi.

Nimin-a thuchhuah an siamah MPYCC chuan October ni 3, 2019 khan District Court Serchhip-a JH. Lalparmawii Judicial Magistrate 1st Class Aizawl Judicial District, Serchhip Court-ah Chief Minister, Lal Than-hawla Affidavit thehluh chungchanga Lal Hriatrenga Chhangte, Serchhip-in a khinna 'Judgement Order' chu tihchhuah niin, Lal Thanhawla hian an puhnaah hian thiam a chang niin an tarlang a. Kau-Tlabung chungchanga eirua puhnaah pawh kum 10 chhung zet chhui anih hnuin Feb. 26, 2010 khan Aizawl District Special Judge, T. Saikunga chuan Lal Thanhawla hian thiamlohna a nei loh thu a lo puang tawh tih an tarlang.

MPYCC thuchhuah chuan Lepse ngam, Court hmaa koh kal theih leh corruption laka mi fihlim ram hruaitu kan nei chu vanneihthlak an tih thu pawh tarlangin, eiruk thubuai neia puh mek Chief Minister, Zoramthanga leh Minister, Dr. R. Lalthangliana te pawh Pu Hawla anga huaisen taka a hun taka Court rorelna ngai pawimawha zahthiam tur leh Court hmaa inlan ve ngam a, an fihlim tak tak anih chuan corruption laka an fihlim zia te Zoram mipui hmaa puang chhuak ve tura an phut thu an tarlang a ni.