P&E Minister in P&E Department Training Centre leh JE Training hmasa ber a hawng

Power & Electricity Minister, R. Lalzirliana chuan nimin khan P&E Department in Tui-vamit-a Training Centre an buatsaih chu hawngin, Junior Executive (JE) te tana ni 3 awh Training buatsaih pawh a hawng nghal bawk.

P&E Department Training Centre hawnna ah hian P&E Minister chuan Training Centre hawn a ni leh chumi ruala Training neih nghal a ni chu lawmawm a tih thu sawiin, Intuaitharna leh intuaihriamna chu a pawimawh thu leh kumtin-a sawrkar hnathawk te hnathawh \hat dan tehfung, ACR-ah te lang thei sela chuan training hian awmzia thui zawk a neih theih a ri thu a sawi a. P&E Department chu Technical Department pawimawh tak an nih angin hnathawk te chu mahni inzir zel turin a chah a. P&E Department hnathawkte chu mipui tana malsawmna ni \hin Department lian taka thawktu an ni tih hre nawn fo a, mipui rawngbawl hna an thawk a ni tih theihngilh lo turin a chah bawk.

P&E Minister, R. Lalzirliana chuan an Department chu Corporation chungchang pawh sawiin, a thu chuan Corporation chu a \hat thu leh amaherawh chu keini ang ramah chuan thingtlang lam kan hnualsuat anga, an hnufum bik ang tih a hlauhawm tih sawiin, Revenue an hmuh \hatna, khawpui-ah te chauh an bur chat anga, abakah chuan an inthlahdah ang tih a venthawn awm tih chu a ngaihdan a nih thu a sawi a. Department hnathawk te chuan rim taka mipui rawngbawl hna an thawk chungin sawiselna te an tawk \hin tih pawh sawiin, an hna chu tihsual emaw, inthlahdah emaw chuan anmahni bakah midang pawhin nunna an chan theihna a ni thei tih sawiin, engkimah an fimkhur a \ul thu a sawi bawk.

P&E Department Training Centre leh Training hawnna hun hi P&E Department-a Superintending Engineer (Mizoram State Load Despatch Centre), Lalbiaksanga chuan kaihruaiin P&E Engineer-in-Chief, C. Lianlunga chuan Training Centre hawn a ni ta chu Department tan mel lung pawimawh tak a nih thu a sawi a. Mipui rawng an bawlna kawnga khawtlang hruaitute leh Department hnathawk te chuan thu leh hla in hrilh zung zung nan Social Media an hmang tangkai hle tih a sawi bawk.

Nimin a hawn tak P&E Department Training Centre hi Tuvamit-a P&E Department ram chhunga awm niin Sub-Station Building hlui chei\hat a ni a, a chei\hat nan hian cheng nuai 44.59 sen niin a Building zau zawng hi square metre 189 a ni a, Training Hall bik hi square metre 126 a zau niin AC leh Projector te pawh dah a ni. He Training Centre thar-a training hmasa ber nimin a neih hi Mizoram-a P&E Division awm zawng zawng 24-a JE 24 te tana buatsaih a ni bawk.