MBDPF te thilphut thar chu hnawl niin tunkar-ah hruaikir hna thawh \an a ni dawn

Tripura Relief Camp 6-a awm Bru aiawhte chuan laklet an nih hmain thilphut thar an neih te Chief Minister hnenah thlen mah se an thil ngiat tharte pawm theih a nih loh thu leh tunkar Ningani a\anga Mizorama hruaikir hna thawh \an a nih tur thu chiang taka hrilh an ni.

Mizoram sawrkar-a Home Department hotute sawi danin Mizoram Bru Displaced People’s Forum (MBDPF)-in Chief Minister, Zoramthanga hnena hruaikir hna thawh hma ngei a Agartala-ah emaw, Kanchanpur-ah emaw Joint Monitoring Group (JMG) \hutkhawm an rawtna chu hnawl a ni a. Ningani khan Tripura-a Dhamcherra-ah Mizoram sawrkar leh Tripura sawrkar aiawhte bakah Relief Camp a awm Bru pawl hrang hrang aiawhte an \hukhawm a. Hetah hian Mizoram sawrkar aiawh a kal Home Secretary, Lalbiakzama leh Official dangte chuan Bru laklet hna chu hun bituk anga kalpui a nih tur thu leh inpuahchahna pawh peihfel thawkhat a nih tawh thu an sawi a. Thil phut thar neih hun a nih tawh loh thu chiang takin an sawi lang nia thudawn a ni. Bru hruaikir chungchangah hian Vawiin chawhnu lam hian Home Minister, Lalchamliana hovin a kaihhnawih Official-te an \hukhawm leh ang.

Ruahman lawk dan chuan thla thar October ni 3, tunkar Ningani khian Kaskau Camp a\angin Bru hruaikir hna hi \an a ni ang a, Kaskau Camp a\ang hian chhungkaw 522 a mi 3,425 te chu hruaikir tur an ni a. Bru Relief Camp zinga Mizoram hnaih ber Kaskau Camp a mi te hruaikir hna ni October ni 10-a zawhfel hman tum a ni. Tripura Relief Camp-a awm Bru chhungkaw 4,447 te hruaikir hna hi November ni 30 a zawhfel hman tur a ruahman a ni. Bru hruaina motor hi hun hmasa lamah Tripura sawrkarin ngaihtuahin a bill hi Mizoram sawrkar-ah an thehlut \hin a, mahse tun \umah chuan Aizawl City Cus leh Maxi Cab te hman tum a ni a. Lirthei ngaihtuah tura Tripura sawrkar an tih tawh lohna chhan hi 'Bill a to \hin em vang' niin an sawi a. Bru hruaikirte lo chawlh lailawkna 'Facilitation Centre' atan hian Kanhmun khua chu tun \umah hian hman a ni leh dawn bawk a ni.

Ministry of Home Affairs hotute hova September ni 6-a Delhi-a Joint Monitoring Group on Bru Repatriation \hukhawmnaah khan tun \um, Bru hruaikir hna vawi 9-na thawh tur hi a tawp ber a nih tawh tur thu sawichian a ni a. Bru hruaitute chu a kir hmasa a \ang tura ngen an ni a, MBDPF hruaitute erawh chuan a hnung an dawl tur thu chanchinbumite an hrilh thung a. Lo kir duh lo an la tam an rin thu an sawi bawk.