CM Office-a kal tum Congress |halai te CM Office Gate-ah lo dan an ni

Congress |halai, MPYCC chuan tunhnaia Mizoram Chief Minister Office (CMO) tual-a Bru raltlante dinhmun \ha zawka Mizoram-a an kir leh theih nan 'Demonstration' neitu Bharat Hitaraksha Abhiyan (BHA) inti te chungchang sawifiah phutin nimin khan CM Office an pan a, Police ten lo dangin hun engemaw chen an innawr.

Bharat Hitaraksha Abhiyan (BHA) inti Indore, Madhya Pradesh behchhan NGO member mi 140 lai chuan kar kalta Inrinni (Sept. ni 7, 2019) khan Mizoram Chief Minister Office (CMO) tual-ah Bru raltlante dinhmun \ha zawka Mizoram-a an kir leh theih nan 'Demonstration' an nei a. Heng hnamdang za chuang zet Bru thlavang hauhtute hi Hindu kulmuk, India ram Hindu rama siam tumtute Rashtriya Swayamsevak Sangh (RSS) nena inthlunzawm an nih thu Mizoram Pradesh Youth Congress Committee (MPYCC) chuan sawiin, Mizoram-a lo kal tura Inner Line Permit (ILP) an neih dan, an Memorandum thehluh, sponsor-tu leh an lo kalchhan chu sawrkar chuan a thup tlat niin an sawi a. Hei vang hian nimin khan MPYCC chuan BHA te Memorandum thehluh enfiah tur leh an nihna hre turin Chief Minister Office-ah hian kal an tum a, Chief Minister Office Gate-ah hian Police ten lo dangin hun engemaw chen an innawr zui a ni.

He hunah hian Congress |halai President, Dr. Lalmalsawma Nghaka chuan Police-ten MPYCC te an lo danna hmunah hian thu sawiin BHA te nihna dik tak puangzar tur hian sawrkar chu an phut thu sawiin, BHA te zalen taka lo luta CM Office tuala an sapatal thei chu MNF sawrkar in an hriatpui ngei a nih an rin thu a sawi a. “Sept. ni 6, 2019 khan Hindu kulmuk pawl hi Tripura a\angin Kanhmun Police paltlangin Mizoram an rawn lut a, hei hi Mizoram sawrkar hian a hre lo thiang lo. BHA hian Mizoram sawrkar hnuaia District Magistrate hnenah an kal tur thu hi lehkhain an hrilh hre hmasa a, Ni 7-ah Chief Minister tual-ah duhtawkin lungawilohna an lantir thei a ni. Bru raltlante thlavang hauha Mizoram leilung fate duhloh dana thutlukna siamtir tumtute zalen taka an rawn kal laiin, kein kan ram, hnam leh sakhua himna tura hma la-a tharum thawh loa Chief Minister Office-a kal tumte min dang tlat thung hi a na kan ti a ni,” a ti bawk.

MPYCC President chuan BHA inti-te hian Tripura-a Bru Refugee Camp chu Mizoram an lo kal hmaa tlawhin Twitter hmangin India ram Prime Minister, Narendra Modi hnenah chhe takin Mizo mipui min hek tih sawiin, 'Pu Prime Minister, Mizoram Kristian te vanga tuartu Bru te dinhmun hi a rapthlak hle a ni, anmahni hi Hindu an ni, an dinhmun hi kan lo hriattir che,'  tiin an zinga mi Dharmadhikari Singh chuan Prime Minister a hrilh tih a sawi a. Mizote hekin Bru Hindu te dinhmun chhiat thu hi Prime Minister hnenah hian vawi tam an thlen a, Tripura Governor pawh an hmuh thu leh Mizoram Chief Minister hnenah Memorandum an thehluh thu Social Media kaltlangin an puangzar niin a sawi a. “Nationalism sawitu MNF party hian BJP an thawhpui tak avang hian Mizorama thleng ngai lo RSS te kaih-hnawih an rawn huangtau ta a, BJP laka dawl zawra zawr MNF hian Zophai ramri chungchang ah pawh engmah an ti thei ta lo a ni,” a ti bawk.

Hemi hnu a MPYCC thuchhuah chuan RSS naute nia ngaih BHA pawl nia inchhal, Hindu rual hian Tripura Refugee Camp-a awm mek Bru chhungkaw 500 lai chu Mizorama hmun khata khawsa turin an nawr pui bakah ram sah-thlak an ngiat sak bawk nia sawiin, an hmalakna chu dodal turin Mizoram mipui zawng zawng an sawm thu a sawi a. “Pathian leh kan ram tan titute sawrkarna hnuaia Mizoram-a kan hotupa ber CM Office tual-ah ngei MNF te thawhpui BJP mi leh sa te ngampa taka an rawn chetla ta mai khan MNF te leh BJP te hi nghet takin an inphiarzawm zia a tarlang,” an ti bawk.