Serchhip-ah School Education Minister hovin India Independence Day hman a ni

India in British awpna ata zalenna a hmuhna ni champhaphak, India Independence Day chu nimin khan rampum ah urhsun taka hman a ni a. Serchhip-ah pawh DC Playground, Khawtetlang-ah he Ni hi hman niin School Education Minister, Lalchhandama Ralte chuan India Hnam puanzar pawtparhin mipuite hnenah thuchah a sawi.

Serchhip-a India Independence Day lawmna hunah hian khuallian School Education Minister, Lalchhandama Ralte hian India Hnam Puanzar pawtparha Parade Chibai buk a chhanlet hnuah minute 17 chhung mipuite hnenah thuchah sawiin Serchhip mipuite chibai a buk a. Kum 72 vel liamta ah khan hnamdang awpbehna leh hnehchhiahna nghawngkawl chu tih tliahin a lo awm tih sawiin, khua leh tui dik tak ten mahni ram ngeia ro kan inrelna ram ni thei turin India chu a lo dingchhuak tih a sawi a. Zalenna hnuaiah kan ram chuan nasa taka hma a sawn thu leh Vawiin ah chuan India ram chu khawvel-a economy lian ber te zing ami a lo ni ta hial tih sawiin, sawrkar hmalakna hrang hrangte a tarlang bawk.

School Education Minister chuan sawrkar Flagship Programme, Socio-Economic Development Policy (SEDP) tih hlawhtlin chu an intiamna a nih thu sawiin, SEDP chu hmasawnna huapzo leh ngelnghet, mipuite dinhmun ti hmasawn tur leh ei leh bar kawnga kan intodelhna tur, khawtlang nun tih hmasawnna tur a nih thu a sawi a. SEDP hlawhtling taka kalpui a nih theih nan Minister te enkawlna hnuaiah Board hrang hrang 14 din a nih thu leh heng Board te hian chak takin hma an lak dawn thu a sawi a. Mitin huap ram hmasawnna chak taka kalpui nan leh ramchhung inawpna leh inrelbawlna a awlsam zawk nan District pathum din thar a nih thu pawh sawiin, District thar te hlawhtling taka kalpui a nih theihna atan sum sen tur pawh sawrkar in a ruahman fel vek tawh tih a sawi bawk.

Education Minister chuan Police Department inpekna avangin nikum chhung khan danin a phalloh thil chi hrang hrang cheng vbc. 58.60 hu man a nih thu pawh sawiin, ruihhlo manchhuak theitu tur Canine Squad din tura hmalak mek a nih thu leh Cyber Forensic Lab-cum-Training Centre din tura hmalak mek a nih thu a sawi a. Tun kum kalmek chhung hian Serchhip District-ah Police ten thubuai ziahluh 106 neiin 80 chu Charge-sheet ni tawhin mi 25 te convict an nih thu leh thubuai kalpui mek mi 57 an awm thu a sawi.

Hriselna kawngah pawh nasa taka hma lak mek a nih thu te, Serchhip District Hospital pawh khawl tam taka thuam\hatna kalpui mek a nih thu sawiin, inkalpawhna kawng siam\hat hna te pawh thawh mek a nih thu a sawi.

Hei bakah hian Saubhagya Scheme hmangin In tin Eng pek kum an nih tawh thu leh Renovation & Upgradation of Protection & Control System hnuaiah Bukpui Sub-Station chu zaa 90 zawh a nih tawh thu Minister hian a sawi a. Serchhip District chhungah Oil Palm chingtu chhungkaw 80 te tharchhuah chu lei sak an nih thu leh cheng nuai 12 chuang man lei sak an nih tawh thu sawiin, FOCUS hnuaiah Sethlum \iak 1167 sem a nih tawh thu a sawi a. Mizo Hmarchate leh Sawhthing ching tur khaw 8 thlang tawhin chhungkaw 540 ten hectare 270-a zau ah an chin dawn thu leh Vawk vulh tipung turin FOCUS hnuaiah chhungkaw 10 thlan an nih tawh thu a sawi bawk.

School Education Minister chuan hetianga hmasawnna duhawm tak tak kan neih theihna bul chu zalenna, ram inrelbawlna \ha, mipuite thlan ngei rorelna ram kan neih vang a nih thu pawh sawiin, mipui sawrkar hlutna leh zahawmna te, ram zalen nih ropui zia te hre renga kan ramin hma a sawn zel theih nana theihtawp chhuaha ke pen puiah mipuite chu a sawm bawk.

Nimin a Serchhip-a India Independence Day hmanna ah hian sawrkar hnathawk leh mipuite an tel \ha hle a ni.