Samthang khua ah Silai leh Magazine man a ni

Champhai Police te leh 8th Assam Rifles Champhai \angkawp chuan nimin zing khan Silai AK-47 pathum leh Magazine 3 an man.

Thudawn danin nimin zing dar 4:00 vel khan Champhai Police leh 8th Assam Rifles te chuan Champhai District chhunga Samthang khuaah Joint Operation an nei a, hetah hian Keilianthanga (52) S/o Satina (L) Dihai khua, Myanmar a cheng ni a insawi hnen a\angin Silai AK-47 leh Magazine 3 ve ve te hi an man ta a ni.

Keilianthanga hi tunkar Thawh\anni khan Samthang khuaah hian kalin a Silai kawlte hi a zuar kual a, nimin zing dar 4:00 vel khan a thlen In-ah Champhai Police leh 8th Assam Rifle te hian a bag chhunga a dah, AK-47 pathum leh Magazine pathum te hi an man a, Magazine-ah hian Silai mu erawh a awm tel lo thung.

Keilianthanga hian heng a Silai kawlte hi nikum-a a lo vahna a a chhar niin a sawi a, kum 10 vel liam ta ah khan an khua, Dilhai-ah VC a nih laiin hel pawl tlanchhia a lo mikhual tawh a, hmanrua engmah keng lovin an tlanchhe chhun-zawm zel a, an hmanrua te an thuhruk ngei ringa a lo zawn \hin tawh thu leh heng a silai kawlte hi hel ho thuhruk a nih a rin thu sawiin, Samthang khuaah lei duh an awm ringin a zuar ta niin a sawi bawk. Silai kawltu Keilianthanga hi Champhai Police Station-ah Arm Act hnuaiah thubuai siam sak a ni a, nimin khan a hriselna endik a nih hnuah District Court-ah hruai a ni. Heng an silai man hi cheng nuai 15 man hu vel a ni.